27 July 2013

ජේසුස් ගේ සලකුණක් කදානෙන් ...



කිතුනුවන්ගේ විශ්වාසය අනුව  විශ්වය මවා පාලනය කරන එකම දෙවි කෙනෙකු විසින් මෙලොවට එවූ එතුමාණන්ගේ එකම පුත්‍රයානන්   වහන්සේ ජේසුස් ක්‍රිස්තුස්ය.

ක්‍රිස්තියානි  ආගම තුල ජේසුස් වහන්සේට ඇත්තේ ප්‍රධානම ස්ථානයයි . ක්‍රිස්තියානිය පදනම් වී ඇත්තේ මොහු වටායි. ක්‍රිස්තු ධර්මිකයන් අතර ජේසුස් වහන්සේ  සර්වබලධාරියා හෙවත් දෙවියන්ගේ එකම පුත්‍රයා ලෙස පිළිගන්නා අතර කුරුසයේ ඇණ ගසා ඝාතනය කිරීමෙන් පසුව මළවුන් ගෙන් නැවත නැගිට ආ බවද විශ්වාස කරයි.

මා ජේසුස් වහන්සේ ගැන හෝ ක්‍රිස්තු ධර්මය ගැන මේ ලිපියෙන් පැහැදිලි කිරීමක් කරන්නට උත්සහ කරන්නේ නැත මක් නිසාදයත් යත් මේ ලිපියේ ලිවීමේ අරමුණ වෙනත් එකක් බැවිනි ..  ඒ නැතත් ක්‍රිස්තු ධර්මය ගැන හෝ  ජේසුස් ක්‍රිස්තුස් ගැන නොදන්නා පිරිස අල්ප බැවිනි ...

ජේසුස් වහන්සේව කුරුසියේ ඇන ගසා මරණයට පත් කිරීමට රැගෙන යද්දී භක්තිවන්ත ස්ත්‍රියක් විසින් ජේසුස් වහන්සේගේ මුහුණ සළුවකින් පිසදානවා පසුව බලන විට ඒ සළුවෙ ජේසුස් ක්‍රිස්තුස්ගේ මුහුණේ සලකුණු සටහන් වී තිබෙන බවට පිළිගැනීමක් තිබෙනවා .


. එසේ වී ඇත්තේ මුහුණ පුරා තිබු රුධිරය නිසා බවයි පැවසෙන්නේ.... එම සළුව බොහෝ භක්ති ආදරයට පත් වෙමින්  අද දක්වාත් සුරක්ෂිතව තිබෙනවා... ඒ සටහන අනුව නිර්මාණය කල ජේසුස් ක්‍රිස්තුස්ගේ පින්තුරද කතෝලිකයන් අතර බොහෝ ජනප්‍රියයි ...




එහෙත් මා කියන්නට සැරසෙන්නේ මිනිස් අතකින් කල නිර්මාණයක් ගැන නොව . සොභාවධර්මය විසින්ම නිර්මාණය කල විශ්මිත නිර්මාණයක් ගැන.

13.07.13 දින කදාන ප්‍රදේශයේ කතෝලික පවුලකට අයත් බිත්තියක ජේසුස් වහන්සේගේ මුහුනෙහි සලකුණු  නිර්මාණය වී ඇති අපුරුව බලන්න.. 


විවිධාකාර මත දරන්නන්ට මේ ගැන විවිද අදහස් දැක්විය හැකි මුත් කතෝලිකයන්ට මෙය තවත් එක් ප්‍රාතිහාර්යයක්  ජීවමාන ජේසුස් වහන්සේගේ සලකුණක් වනවා නොඅනුමානය ...........  

25 July 2013

කෙල්ලන් අතර වීරයෙක් ....





මිනිස්සුන්ට හිටි ගමන් හරි පුදුම වැඩ වෙනවා  අපේ ජනකාන්ත අයියත් නොසිතු නොපැතූ වෙලාවක අහම්බයකින් කෙල්ලෝ ගොඩක් අතර වීරයෙක් වීමේ අවාසනාවන්ත කතාවයි මේ .

 ජනකාන්ත අයියා  ගැන මගේ  කතාන්දර කිහිපයක ලියවිලා තියෙන නිසා ආයෙත් උන්දැගැන අමුතුවෙන් විස්තර කරන්න අවශ්‍ය  වෙන්නේ නැහැ  මම අර කතාවක කිවා වගේම උන්දැ  මහදැන මුත්තාගේ පුනර්භවයක්. . ඉතිං එහෙව් උත්තමයෙක් ගැන බ්ලොග් ලිපි ලියන එකත් මට ආඩම්බරයක්. තව ඉදිරියටත් මගේ බ්ලොගයේ උන්දැ ගැන පුංචි රසකතා රාශියක් ලියවෙන්න ගොඩ ගැහිලා තියෙනවා .. උන්දැ ඒ තරමටම පිංවත්.

මේ කාලේ වෙන කොට අපි   පුංචි කොලු කුරුට්ටෝ.  ඒත් වැඩි ඈත කාලේකමත් නෙවෙයි  උසස් පෙළ අහවර කරපු සංදියේම වගේ . මේ කාලේ වෙනකොට අපි පිහිටුවා ගත්ත තරුණ සමිතියක් තිබුනා. ජනකාන්ත අයියත් ඒකේ යාව ජීව සාමාජිකයෙක්  මතකේ හැටියට භාණ්ඩාගාරික වගේ තනතුරකුත්  දෑරුවා ..

දවසක් ප්‍රදේශයේ සියලුම සමිති සමාගම් වල තරුණ තරුණියන් ඒකරාශී කරගෙන විනෝද චාරිකාවක් යන්න සුදානම් කර තිබුනා  පියතුමාගේ මුලිකත්වයෙන් .

උදේ පාන්දරින්ම චාරිකාව ආරම්භ කරලා රටේ ප්‍රධාන ස්ථාන කිහිපයකම අපි  කරක් ගැහුවා ඒ අතර සිදුවූ සිදුවීම් එමටයි  එවා පස්සට .මේ චාරිකාවේ අපේ කතානායකයා නිහඩ චරිතයක් වුනා   ඒ කියන්නේ  අපි අදුනන්නේ නැති විශාල පිරිසක් ඉදිරියේ ඔහු කැපී පෙනෙන චරිතයක් වුනේ නැහැයි කියන ඒක .. මේ වගේ චාරිකාවක කැපී පෙනෙන චරිත වුනේ මහා හයියෙන් බෙරිහන් දීලා සිංදු කියන උන් සහ උවමනාවෙන් කැපී පෙනෙන්න විකාර වැඩ කරපු කිහිපදෙනෙකුයි විතරයි . ජනකාන්තා අයියා කලේ උන්දැ දන්නා අදුනන පුංචි කොලු කුරුට්ටෝ කිහිප දෙනෙක් ලංකරගෙන  ගජබින්නයක් ඇදබාපු ඒක විතරයි .

අවසානයේ අපි පැමිණුනා අම්පිටිය ප්‍රදේශයේ ඇති දෙව් සත්හලට , දෙව් සත්හලක් කියන්නේ කතෝලික ආගමික පූජකවරුන් බිහි කිරීමට ළමුන් සුදානම් කරන පුහුණු කරන ස්ථානයක් ..

මෙතැනට ගිහින් වැඩි වෙලාවක් යන්න කලින් අපි  දැක්කා වත්තේ කෙලවරේ තියෙන විශාල පිහිණුම් තටාකේ. වැඩි වෙලාවක් යන්න කලින් එකා දෙන්නා මෙතැනට එකතු වෙන්න ගත්තා .

හැබැයි මේ තටාකේ අවුරුද්ද කින්වත්  පාවිච්චි කරපු එකක්නම් නෙමේ.. තටාකේ වතුර පල් වෙලා හරියට නිකම් බේරේ වැව වගේ වතුර කොළ පාටයි කොළ පාට පාසි වලින් ටයිල් වැහිලා ඒ මදිවට ගෙම්බෝ පිරිලා ... අපිරිසිදු එකේ උපරිම කිව්වොත් හරි ..

ඔන්න ඉතින් පිහිණුම් තටාකේ ලග තැනිතලාවේ කට්ටිය කල්ලි ගැහුනා , මොකද එක බස් එකේ ආවට කණ්ඩායම් කිහිපයක් නිසා බැස්ස ගමන් කල්ලි ගැහෙන එක සාමාන්‍යයි, සමහරුන් සෙල්ලම් කරන්න ගත්තා ඔහොම කාලේ ගෙවීගෙන යද්දී ,  ඒක පොෂ් තරුණියක් බෙරිහන් දෙන්න ගත්තා , එයාගේ සපත්තුව නැතිවෙලාලු  ..


කෙල්ලත් හැඩට වැඩට ඉන්න නිසා කොල්ලෝ ඔක්කොම තමන්ගේ වැඩ නවත්තලා සෙරෙප්පු සෙවීමේ මහා මෙහෙයුමක් දියත් කළා .. සෙරෙප්පුව හොයලා දෙන එකාට ඉතින් පොෂ් නංගිගෙන් ලකුණු ටිකකුත් ලැබෙනවා  ඉතින් වැඩේ පාඩුත් නැහැ .

ගස් ගල් මුල් පීරලා හෙව්වත් එකෙක්ටවත් සෙරෙප්පුව හොයාගන්න ලැබුනේ නැහැ  මේ අතරේ  කවුදෝ කෙනෙක් දැකලා තිබුනා සෙරෙප්පුව තියෙනවා ,

පිහිණුම් තටාකේ ,

පිහිණුම තටාකේ කෙලෙවරක නෙමේ හරි මැද්ද හරියේ උඩ පාවෙවිත් නෙවේ අඩියක් විතර වතුර යටට ගිහින් පාවෙනවා .. හරියට නිකන් සෙරෙප්පුව හොයපු කොල්ලන්ට කොලොප්පන් කරනවා වගේ පුලුවන්නම් මාව උඩට ගනින් කියලා ..හෙක්..හෙක්..,

සෙරෙප්පුව ගන්න එකනම් ලේසි උනේ නැහැ ,  තටාකේ විශාලයි ඒ තරමට දිග ලියක් නැති කමෙන් සමහරු පුන්චි කෝටු කෑලි දික් කරමින් අසාර්ථක වෑයමක යෙදුනා.. සමහරුන් උඩ ඉදන් ගල් ගැහුවා ඒත් ඒ එකක්වත් සාර්ථක වුනේ නම්  නැහැ .. ඒ අතරේ අඩන්න ඔන්න මෙන්න ඉන්න සෙරෙප්පු අයිති කාර නංගියේ ස්වීට් මුණ සෙරෙප්පුව ගන්න වෙහෙසෙන අපේ කොල්ලන්ගේ මොරාල් අප් කළා , මේකත් පුංචි තරගයක් වගේ .. සෙරෙප්පුව ගන්න එකා දිනුම්.


මෙන්න මේ අවස්ථාවේදී තමයි කොහේදෝ හිටි අපේ කතා නායකයා මේ ස්ථානයට අවතීර්ණ වෙන්නේ.. උන්දැට එතැනට එන්න ලේසි වුනෙත් නැහැ සියයක් විතර පිරිසක් තටාකේ  වට කරගෙන ඉන්නකොට අස්සෙන් මුල්ලෙන් රිංගලා ජනකාන්ත අයියා පිහිණුම් තටාකේ ගැට්ට උඩටම ඇවිත් බෙල්ල දික් කර කර සෙරෙප්පුව දිහා බලනවා අපිත් දැක්කා ..

වෙලාවත් ගෙවීගෙන යද්දී සෙරෙප්පුව ගන්න මෙහෙයුමත් අසාර්ථක වෙන්න ගත්ත මොහොතේ සෙරෙප්පු මෙහෙයුමට සම්බන්ද තරුණයන්ගෙන් විවිධ යෝජනාත් ආවා .. අපි මෙයාට මේ වගේම සෙරෙප්පු දෙකක් අරගෙන දෙමු වගේ..ඒවා ,

මේ අතරේ කවුරුත් බලාපොරොත්තු නොවූ දෙයක් වුනා..
“ජබොක් “ ගාලා සබ්දෙකුත් එක්ක ජනකාන්ත අයියා ස්වීම් ෆුල් ඒක මැද්දේ,

නිකන්මත් නෙමේ  ඇදගෙන ආව ඇදුම් පිටින්ම .. ඒ මදිවට සේරෙප්පුත් පිටින්ම,


ජනකාන්ත අයියා වතුරට පනිද්දී විසිවෙච්ච වතුරෙන් නැවිච්ච උන් හතර අතේ දුවන්න ගත්තා වතුරේ ගද උහුලන්න බැරුව.. ඒ අතරේ අහක හිටි උන් තටාකේ වටේ තවත් රොක් වෙන්න ගත්තා මේ වෙන දේ අදහාගන්න බැරුව.. ඒත් ජනකාන්ත අයියගේ අරුම පුදුම වැඩ ගැන දන්නා කියන  අපි කිහිප දෙනෙක් විතරක් උපේක්ෂාවෙන් මේ සිදුවීම නැරබුවා ..

පැන්න ගමන් දෙපාරක් විතර වතුර යට ගිහින් උඩ ආව ජනකාන්ත අයියා අන්තිමේදී අත පය ගහලා වතුර උඩට පිනගෙන ඇවිත් කට පුරෝගෙන හිටි වතුර ටික පැත්තකට විදලා එහෙම පළපුරුදු පිහිණුම් ක්‍රීඩකයෙක් වගේ තටාකේ වටේ වටයක් පිනගෙන ගියා .. උන්දැට බය වෙච්ච වතුරේ හිටි ගෙම්බෝ රංචුව හතර අතේ පනින්න ගත්තා. 

අන්තිමේදී කිමිදිලා අර ගැහැණු දැරිවිගේ සෙරෙප්පුව අරගෙන අන්තිමේදී වැටුනු උන්දැගේ සෙරෙප්පු දෙකත් අරගෙන ගොඩට එනකොට.. කෙල්ලෝ ඔක්කොම  අත්පුඩි තැලුවා .. විසිල් ගහන්න පුළුවන් කොල්ලෝ විසිල් ගැහුවා ... එකෙක් දෙන්නෙක් “හු” ත් තිබ්බා ..


අන්තිමේදී ජරාව නාගත්තු ජනකාන්ත අයියා විසින් සෙරෙප්පුව අයිතිකාර නංගිට පිළිගන්වන මොහොත හරිම හැගීම්බර වුනා.. කෙල්ල නොසෑහෙන්න ජනකාන්ත අයියට ස්තූති කළා .. වටේ පිටේ තව උන් බලාගෙන නොහිටියානම් කෙල්ල ජරාව නාගෙන උන්නු ජනකාන්තට තොත්තුවක් උනත් දෙන්න ඉඩ තිබුනා ..ඒත් ජනකාන්ත අය්යාගේ කරුමෙට එතන  අපි හිටියා ..  ඒ නැතත් ඒ ගැහැනු ළමයා ගැන උනන්දුවෙන් හිටි කොල්ලන්ගේ ඉරිසියාකාර දෑස් ජනකාන්ත දිහාටම එල්ල වෙලා තිබුනා ..


අන්තිමේදී කට්ටිය එතැනින් පිටවෙද්දී කෙල්ලෝ අතර ජනකාන්ත අයියා වීරයෙක් වෙලා ඉවරයි... ඒත් පරහකට තිබුනේ  ජරා වතුරෙන් තෙත බරිත වෙලා තිබුණු වීරයාගේ  ඇදුම් වලින් එන දුගදයි .. එකටත් කෙල්ලෝ පිලියමක් හෙව්වා , උන් ලග තිබුණු සෙන්ට් කුප්පි ටික මල්ලක දාල ගෙනත් ජනකාන්තට දුන්නා..

පස්සේ දෙව්සත්හලේ  නාන කාමරයෙන් ජනකාන්තව නාවලා,  ඇදුම් ටිකත් හෝදලා දීලා එහෙම පස්සේ සෙන්ට් වලිනුත් නාවලා අපි උන්දැව එතැන  තියලා (ඇදුම් නැතිව එක්ක යන්න බැහැ ) වෙන වැඩකට ගිහින් ආයෙත් ඇවිත් බලනකොට ජනකාන්ත අයියා එතැන නැහැ ..


පස්සේ හොයද්දි දැක්ක දෙයින් පපුව හෝස් ගාලා ගියා .. කාගෙන්දෝ සරුන් කඩමල්ලක් ඉල්ලගෙන ඇදගෙන උන්නු ජනකාන්ත අයියා වත්තේ කෙළවරකට වෙලා අව්ව තියෙන තැන් වලට දම දමා තෙත ඇදුම් වේලනවා .. අපිත් එතනට කිට්ටු කළා ..

“අපරාදෙනේ ජනකාන්ත අය්යා උබ ඇදුම් පිටින්ම වතුරට පැන්නේ..  අඩු තරමේ ෂර්ට් එකවත් ගලවන්න තිබුනනේ...

“ඔව් ගලවන්න තිබුනා “

“එහෙනම් ඇයි එහෙම නොකලේ...”

අපි දිහා ටිකක් බලාගෙන උන්නු ජනකාන්ත අයියා

“ඒවායින් වැඩක් නැහැ මට යන්න ඉස්සෙල්ලා තව වැඩක් තියෙනවා කරන්න “

ඒ කියපු විදියත් මිනිහගේ ස්වරුපෙත් අපිට එච්චර ඇල්ලුවේ නැහැ ..

“ඒ මොකක්ද  “

“මම ස්වීම් ෆුල් ඒක දිහා බලාගෙන ඉන්නකොට පිටි පස්සේ ඉදන් මාව තල්ලු කරපු එකාව හොයාගෙන උගේ අ#@(*7^%$  වන්න ...


------------------------------------------------------------------
***
*#@(*7^%$ = අසභ්‍ය වචන බැවින් පලකල නොහැක :D











05 July 2013

අත්භූත පැමිණීම.(සත්‍ය කතාවකි )- He is coming back.



ඉහ උඩින් යන්නාක්මෙන් ඇසුණු යකඩ යකාගේ ශබ්දයෙන් කරුණාවතී අවදිවිය. රේල්ලුව අසලම ලැයිමේ ජිවත්වන ඇයට මතක ඇති කාලයේ පටන් පාන්දර අවදි වීමට වේලාව කිවේ මුතු මැණිකේ දුම්රියයි . හතරයි පහලොව වන විටම  රාගම දුම්රියපොළ පසුකරගෙන යන මුතු මැණිකේ දුම්රියේ හඩ  කරුණාවතීට අදත් අවදිවීමට  වේලාව කිවේය .

එතැන් පටන් ගේ දොර අස් පස් කර දරු දෙදෙනාගේ පාසැල් ඇදුම් සුදානම් කර  සිය සැමියාගේ දිවා ආහාරය සුදානම් කිරීම ඇයගේ ෛදනික   රාජකාරියයි කොළඹ කන්තෝරුවක සේවය කරන සිරි දාස වන ඈගේ සැමියාව අවදි කරවන්නේ ඉන් පසුවය.

සිරිදාස රාජකාරි සදහා පිටත්වන්නේ දරු දෙදෙනාව පාසැලට ඇරලවීමෙන් පසුවය . දරු දෙදෙනාවත් සුරතින් අල්ලාගෙන නිවසින්  පිටවන සිරිදාස පාර කෙලවරට ගොස් නොපෙනී යනතුරුම දොරකඩ සිට බලාගෙන සිටීම කරුණාවතිගේ පුරුද්දය .  එහෙත් මෙදින සිය සැමියා යන්නේ ඉරණම් ගමනක් වග මොහොතකටවත් ඇයට නොසිතෙන්නට ඇත .

ස්ටේෂන් එක පසුකර උඩ පාර දිගේ ගොස්  පල්ලියේ ඉස්කෝලෙට දරු දෙදෙනා ඇරලවා නැවතත් පාගමනින්ම ස්ටේෂමට එන  සිරිදාසට බොහෝ දුරට දකින්නට ලැබෙන්නේ ස්ටේෂමට පැමිණ කොලඹ කොටුව බලා දිවෙන දුම්රිය හෙමිහිට ඉදිරියට ඇදෙන  අයුරුය. එහෙව් දිනෙක දිව ගොස් ධාවනය වන දුම්රියේ දොරක හෝ  එල්ලීමට සිරිදාස පසුබට නොවෙති .

එහෙව් දිනෙක කෝච්චියේ ඇතුලේ සිටිනවුන්ගේ වාග් ප්‍රහාරයන් නොඇසුනාක්මෙන් බිම බලාගෙන කඩිමුඩියේ ගොස් හැමදාම යන හතරවන මැදිරියේ සිටින මිතුරන්හා එක්වන්නේ කිසිවක් නොවූ අයුරෙනි . ඔහුට දුම්රිය ගැන කිසිදු සැකක් බියක් දැනුනේ නැත.  කුඩා කල සිටම හුරු පුරුදු දුම්රිය වියපත් සිරිදාසට දැන්  ලබැදී මිතුරෙකුටත් වඩා සමීපය... ඒ මිතුරාම ඔහුට සතුරුවේ යැයි ඔහු කිසිදිනෙක නොසිතන්නට ඇත 

උදේ කොටුව ස්ටේෂන් එකෙන් බැස වෙන්වී යන  දුම්රිය සගයන් නැවතත් දවස අවසානයේ රැකියා අහවරවී පැමිණ එකතු වන්නේද  හතරවන දුම්රිය මැදිරියේදීමය.

අදත් සිරිදාස සුපුරුදු පරිදි කොටුව නැවතුමෙන් හතරවන මැදිරියට ගොඩවූයේ මිතුරන් හා සැමදා යන ආසන පේලියට යෑමටය.. එහෙත් අද ඔවුන්ගේ ආසන අන්සතුවී ඇත.. වෙනදා නොදකින කාර්යාල සේවකයන්ගෙන් කෝච්චි පෙට්ටිහි තද බදයක් ඇතිවී තිබේ . අද බස් රථ වර්ජනයක් ඇතිබව සිරිදාසට මතක්වුයේ එවිටය .

වෙනදා තමන් සමග එකට වාඩිවී යන මිතුරන් අද එකෙක්වත් සුපුරුදු ස්ථානවල නැත.. ඔවුන් ඉඩ ඇති ඇති තැන්හි ගාල් වෙන්නට ඇත සිරිදාසද ඉඩ කඩ ඇති කොනකට සෙන්දුවන මොහොතේ ඔහු දුටුවේ සෙනග අතරින් තෙරපෙමින් ඔහුවෙතට ලගාවෙන නිමල් ගේ රුවය  . නිමල්ද සිරිදාසලාගේ දුම්රිය මැදිරි සමාජයේ සාමාජිකයෙකි

“සිරිදාස අය්යා අදනම් අපේ ෂිට් එකක්වත් නැහැ.. අද බස් වර්ජනේනේ , වෙනදට බස්වල යන අයත් අද කෝච්චියේ නැගලා ..”

“ඔව් මලයා ඒත් මටනම් හිටගෙන යන්න බැහැ මේ හන්දිපත් අමාරුවත් එක්ක ..”

එසේ කියූ සිරිදාස පාපුවරුව අසලට ගොස් සාක්කුවෙන් ගත් ලේන්සුව බිම එලා  වාඩිවන සැටි නිමල් බලාසිටියේය..  ලබැදී  මිතුරා සමග මද වේලාවක් දොර අසල සිට දොඩමළුවූ නිමල් ඔහුට සමුදී  නැවතත් සෙනග අතරින් මැදිරිය ඇතුලට රිංගුවේ ඔහුගේ කාර්යාල බෑගය වෙනකෙකු අත තබා ආ බැවිනි...

සියලුම නැවතුම් පලවල්හි  නවතමින් අඩ හොරාවකටත් වැඩි කාලයක් ධාවනයවූ දුම්රිය රාගමට ලගාවේමින් සිටින විට ඇතුලත තෙරපෙමින් සිටි නිමල් නැවතත් දොර අසලට පැමිණෙමින් සිටියේය ඒ අතරම  ඔහුට  නිකමට මෙන් තම මිතුරා වාඩිවී සිටි පාපුවරුව දෙස බැලුණි ...  එහෙත් දැන් එතැන ඔහු නැත 

මැදිරිය පුරා සෙව්වත් ඔහු පෙනෙන්නට සිටියේ නැත..  අවසානයේ පාපුවරුව අසලටම ගොස් බැලු නිමල්ට දකින්නට ලැබුනේ පාපුවරුවේ යට කොනක පැටලී සුළගට ලෙල දෙන සිරිදාසගේ ලේන්සුවය ..

කුමක්හෝ අසුභ දෙයක් සිදුවී ඇතිබව නිමල්ට ඉවෙන්මෙන් දැනුනි .. ඔහු වහා දිවගොස් දුම්රියේ හදිසි අනතුරකදී පාවිච්චි කිරීමට ඇති  දම්වැල ඇද්දේය ..
......................................................................................................................................


සිරිදාස පිටවූ පසු කරුණාවතී  දහවල් කාලයේදී පාසැල් නිමවීමෙන් පසු දරුවන් රැගෙන විත් ගේ දොර වැඩ අහවර කරයි.. ඒ කෙසේ වෙතත් ස්වාමියා පැමිණෙන වේලාව ලංවන විට වතුර එකක් උණුකර බේසමට දමා ගේ පිටිපස්සේ කණ්ඩිය උඩින් තැබීම  ඇය විවාහා වූ දින පටන් නිතිපතා කරගෙන ආ කාරියකි. ඒ සිරිදාසට රැකියාව නිමවී නිවසට ආ විගස උණුසුම් වතුරෙන් ඇගපත සෝදාගැනීමට අවශ්‍ය වන නිසාය .
මෙදිනද වතුර බේසම සුදානම් කර කණ්ඩිය උඩින් තැබූ කරුණාවතී මිදුල අමදිමින් සිටියේය ... සුපුරුදු වේලාවටම සිරිදාස ආවේය ..

“අන්න මම වතුර ටික කණ්ඩිය උඩින් තිබ්බා ... ඇග  සෝදා ගන්න “

සිරිදාස වචනයක්වත් කිවේ නැත. නිහඩ චරිතයක්වූ සිරිදාසගේ මෙම හැසිරීම් විලාසය හොදින් දන්නා  කරුණාවතී එය නොතකා කරමින් සිටි කාරියේම නිරත විය ..

එහෙත් එක්කම මහා හඩින් ඇසුණු ත්‍රි රෝද රථයේ තිරිංග ශබ්දයෙන් ගැස්සී ගිය ඇය පාර දෙස බැලුවේය  එහි සිටියේ අසල්වැසි තරුණයෙක්වූ ජගත්ය.

“මොකෝ බං මේ හදිසිය ..”

කරමින් සිටි වැඩේ මදකට නතර කල කරුණාවති  නෝක්කාඩු ස්වරුපයක් මවාගත්තේය ..

“කරුණාවතී නැන්දේ සිරිදාස මාමා කෝච්චියෙන් වැටිලා...

තැතිගත් විලාසයෙන්  එසේ පවසමින් කඩුල්ල පැන තමා දෙසට එන ජගත්  දෙස ඈ බලා සිටියේ සිනාසෙමිනි .

“උබට පිස්සුද ජගත් , සිරිදාස මාමා  මේ දැන් ආවා විතරයි  ආ ..න්න ඉන්නවා ඇතුලේ ..

එසේ කියමින් කරුණාවතී  නිවස තුලට කර පෙව්වේය .. එහෙත් ඈගේ ඇස ගැටෙන මානෙක සිරිදාස නොසිටියේය ..

“මම හිතන්නේ ඇග සෝදන්න යන්න ඇති, උබ මේ වෙන කෙනෙක් වැටුන එකකට රැවටිලා .. වරෙන්කො යන්න පෙන්නන්න මාමාව..”

මෙතෙක් වෙලා තුෂ්ඨිම්බුතව සිටි ජගත්ද කරුණාවතී පසුපසින් නිවෙස තුලට වැදුනි ..

ගේ පිටුපස කණ්ඩිය උඩ  උණුවතුර බේසම  එලෙසම තිබේ. එයට   කිසිවෙකු අත තබාවත් ඇති බවක  සලකුණක්වත් පෙනෙන්නට නැත  .. කුඩා වත්ත  හතර මායිමේවත් සිරිදාස පෙනෙන්නට නැත ,

“මේ දැන් ආව මනුස්සයා කොහෙට ගියාද , කියමින් කරුණාවතී  හැරුනේ ඔවුන්ගේ නිදන කාමරය දෙසටය  එහිද සිරිදාස පැමිණුන වගට කිසිම සලකුණක් නැත , උනා දැමූ ඇදුම්වත් , දාගෙන ගිය පාවහන්වත් , කාර්යාල බෑගය වත් එහි නැත. කිසිදා නොදැනුනු බියක් කරුනාවතියේ සිතට දැනෙමින් තිබු මොහොතේ මෙතෙක් නිහඩව සිටි ජගත් ආයාසයෙන් කතා කළේය .. ඒ මෙතෙක් කාලයක් කරුණාවතී ඇසු නරකම පුවතයි ..

“කලබල වෙන්න එපා නැන්දේ, සිරිදාස මාමා කෝච්චියෙන් වැටිලා ඒකේම රෝදෙකට අහුවෙලා.  ඉස්පිරිතාලෙට ගෙනියද්දීත් මාමාගේ පන ගිහින් ...මම එතැන ඉදලයි ආ....

ජගත්ට එය අවසන් කිරීමට ලැබුනේ නැත සිහි විසක්ඥ වූ කරුණාවතී ඇද වැටුණි .

  ............................................................................................................................
ප ලි :- මෙය වසර ගනනකට පෙර සිදුවූ සත්‍ය සිදුවීමකි . මෙය  සිරිදාස යනුවෙන් මා හැදින්වූ පුද්ගලයාගේ දෙටු පුත් විසින් මා හා පවසන ලදී .

01 July 2013

සොසේජස් හදන්නේ මෙහෙමයි - How to make sausage..


සොසේජ් ගැන විවිද අදහස් දරන ලාංකිකයන් මට හමුවී තිබේ . බොහොමයක් දෙනාගේ අදහස අනුව එය නිතර පරිභෝජනය කිරීමට සුදුසු අහාරක් නොවේ. යම් තරමකින් එහි සත්‍ය තාවයකුත් නැතුවාම නොවේ.  ඒ කෙසේ වෙතත්  සොසේජ් නාමයකට සම්භන්ද  සමාගමක රැකියාවක නියුතු යැයි  හදුන්වා දුන් විටෙක බොහොමයක් දෙනා අසන්නේ එය නිෂ්පාදනය කරන ආකාරය ගැනය .

ඒ සම්භන්ධයෙන් සමාජය තුල  මුල් බැස ඇති මතිමතාන්තර සහ සිතුවිලිවල නිරවද්‍ය සාවද්‍ය භාවය මැන  ගනු වස් ඔවුන් ගැටළු යොමුකර සිටිති ,  

එවැනි අවස්ථා වලදී  කෙටි පිළිතුරකින් එහි සත්‍ය අසත්‍ය තාවයන් පවසා නිහඩවිම හැර දීර්ග පැහැදිලි කිරීමක් කිරීමට අපහසුය . එබැවින් එවැනි ගැටළු වලට පැහැදිලි කිරීමක් වශයෙන් සත්වයෙක් සොසේජ් එකක් දක්වා පරිවර්තනය වීමේ ක්‍රියා වලිය මෙසේ ලියා තබන වගයි .

සොසේජස් ලංකාවේ ජනතාවට හුරුවුයේ කොයි අවදියේ සිටද කියා  හරියටම නිගමනය කිරීමේ හැකියාව නැතිවුවත් මාගේ මතකය නිවැරදිනම් සොසේජස් සම්භන්ධයෙන්  මුලින්ම දැවැන්ත ප්‍රසිද්දියක් සමග නිෂ්පාදනය ආරම්භ කලේ කීල්ස් සමාගමය. එයිට පෙර සමාගම් සොසේජ් නිෂ්පාදනය කලත් ලංකාවේ වැඩිපුර සොසේජස් කියන ආහාරය  ප්‍රචලිත කලේ කීල්ස් සමාගම  ඒ මෙයිට වසර විස්සකට විතර උඩදීය.  මතකද අරවින්ද සිල්වා ක්‍රිකට් ගහලා එහෙම ඇවිත් සොසේජ් කන දැන්වීමක් රුපාවාහිනියේ ප්‍රචරයවුනා ඒක වෙන්න ඕනේ ප්‍රථම දැන්වීම .

දැනට ලංකාවේ මාංශමය  ආහාර නිෂ්පාදකයන් වශයෙන් නම් දරා සිටින ආයතන වන්නේ ,කීල්ස් ,කාර්ගිල්ස් ,ගිල්ස් ,එලිෆන්ට් හවුස් ,ප්‍රීමා ,පුස්සැල්ලා ෆාර්ම්, යන නාමයන් , ඒ අතරින් සොසේජස් සදහා එදා සිටම අදටත් ජනප්‍රියත්වයේ ඉහලින්ම සිටීමට කීල්ස් ආයතනය සමත්වී තිබෙනවා ,

එයට ප්‍රධානම හේතුව ලංකාව තුල සොසේජ් ජනප්‍රිය කිරීම ප්‍රථමයෙන්ම සිදුකල ආයතනය කීල්ස් වීම . අදටත් බොහොමයක් උදවිය වෙළද සැලකට ගොස් සොසේජ් පැකට් එකක් ඉල්ලන්නේ කීල්ස් පැකට්ටුවක් දෙන්න යනුවෙනි . සොසේජ් කියා නොවේ .


බලන්න ඉහත  රුපයේ ආහාර ගනිමින් ඉන්න , සුකරයා දිහා ඌ කොයිතරම් අහිංසකද , හුරතල් පාටද , මටනම් පෙනෙන්නේ එහෙම. ඒත් එක්කම බලන්න එයිට එහායින් ඇති සොසේජස් පිරිසිය. ඔබට කවදාවත් සොසේජස් එකක් කන විට එහි මාංශ හිමිකරුවා මතක්වී තිබේද ?, මෙතන හැටියට ඌරව.   මටනම් කවදාවත් නැහැ....

දැන් අපි බලමු  පහත  රුපයේ සිටින සුකරයා , සොසේජස් එකක්වී ඔබේ ආහාර පිගානට එනතෙක් ක්‍රියාවලිය සිදුවන්නේ කෙසේද කියා ...





පහත  රූපයේ දිගටම එල්ලා සිටින්නේ  දෙපළු කල ඌරන් . මා දන්නා පරිදි ලංකාවේ පමනක් නොව ලෝකයේ අනෙක් රටවලටද ආහාර නිෂ්පාදනය සදහා සතුන්ව රැගෙන එන්නේ මේ ආකාරයටමය . ලංකාවේ කර්මාන්ත ශාලා වලට මෙම සතුන් රැගෙන එන්නේ ලංකාව තුලම ඇති ෆාම් වලිනි ,  (මේ සටහන සදහා මා යොදාගත් සත්වයා සුකරයා බව සලකන්න )
ෆාම් වලින් රැගෙන එන සත්ව මාංශ මිලදී ගැනීමේදීද ක්‍රම වේදයක් ඇත.  අනිවාර්යයෙන්ම එතැනදී සත්ව විද්‍යා උපාධිධාරී  තත්ව සුපරික්‍ෂක වරයෙකුගේ  අදීක්ෂණය යටතේ මාංශ වාර්ගි කරණය කරනු ලබයි . එසේ වර්ග කරනු ලබන්නේ සත්වයාගේ තෙල් තට්ටුව මතයි. ඝනකම් තෙල් තට්ටුවක් ඇතිනම් එම සත්වයා තත්වයෙන් දෙවැනි තැනට වැටේ ( ඒ සදහා සතුන්ගේ  සම්මත බර  ප්‍රමාණයක්ද  ඇත ) ඒ කියන්නේ දෙවැනි තත්වයට වැටෙන සතුන් මිලදී ගැනෙන්නේ අඩු මුදලකටය එසේ නැතහොත් එම සතුන් ප්‍රතික්ෂේප කර හරියි . සතුන් ගැනීමේ ක්‍රම වේදය එසේය . ( එළුවෝ වෙනුවට බල්ලෝ කවලම් වෙන්න කොහෙත්ම විදියක් නැත )

එසේ ගෙන එන මස්  ජලයෙන් සෝදා පිරිසිදු කර ශිතාගාරයකට (chiller) යොමු කරනු ලබයි   මෙම ශිතකාමරයේ උෂ්ණත්වය 0- + 4 වියයුතුය.

එයින් පසු මේ සතුන්ව තියුණු පිහි ආධාරයෙන්  (Deboning) කොටස් වලට වෙන් කරනු ලබනවා  , ලංකාවෙනම් මේ කාර්යය සිදු කරන්නේ මිනිසුන් විසින් සමහර රටවල මැෂින් එහෙමත් භාවිතා කරන අවස්ථා තිබෙනවා  , එහෙත් බොහෝ රටවල මෙය සිදු කරන්නේ  අතිනි , අතින් කරන එක වඩා සාර්ථක බව පිළිගැනෙනවා ,  මේ අංශයේ පළපුරුදු දක්ෂයන්ට විදේශ රටවලින් හොද ඉල්ලුමක් තිබෙන බවද  පැවසෙනවා .


මේ කපන වැඩෙත් ආගිය අතේ කරන කැපිල්ලක් නොවේ එයත්  යම් තාක් දුරට සංකීර්ණ කාරියක් . සත්වයාගේ කොටස් වෙන් කිරීමටද  ක්‍රම වේදයක් තිබේ . එක එක කොටස් වෙන් වන්නේ එක එක ආහාර වර්ග නිෂ්පාදනයටය 

.  ඒ සදහා පහත ඇති දළ සටහන් දෙක පරික්ෂා කරන්න  . ප්‍රථමයෙන් ඇත්තේ කොටස්  වලට කියන නම් සහ දෙවැනි එකෙන් ඒවායින් කරන නිෂ්පාදන.. ( මෙතන සියලුම කොටස් දක්වා නැත )


එයින් පසුව මෙසේ කොටස් වෙන් කර  ගන්නවා එක එක  කෑම වර්ග සදහා සොසේජ් සදහා යොදා ගන්නා  කොටස්.  කුට්ටි ලෙස බෑග් වල අසුරා  අධි ශිත කාමර වල තැම්පත් කරනු ලබනවා . ඔය පහත රූපයේ දක්වා ඇත්තේ එවැනි ශිත කාමරයකි. ඕකකට ගොස්  විනාඩි හයක් හතක් දොරවහගෙන හිටියොත් ලේසියෙන්ම අයිස් කුට්ටියක් බවට පත්වීමට පුළුවන . මෙහි ශීතකරණ උෂ්ණත්වය -18 කී .


*එසේ ශිතකර දැඩි ඝනත්වයට පත් කෙරු  මස් කුට්ටි ඉන් පසුව  සාමාන්‍ය තරමේ කැබලි වලට කපනු ලබනවා එය සිදු කරන්නේ පහත ඇති  යන්ත්‍රයෙනි  එහි සිරස් අතට ඇති තියුණු තලයෙන් ක්ෂණිකයෙන් කපා වෙන් කල හැකියි. වැරදීමකින් හෝ අනාරක්ෂිත හස්තයක් වුවද එහි ගැටුනහොත් අස්ථිය වුවද කැපී වෙන්වී යෑමට ගතවන්නේ තප්පරයකටත් අඩු කාලයකි .


මා මෙතෙක් වේලාවක් සදහන් කලේ pork sausage එකක් සෑදීම සිදු කරගෙන යන ආකාරය  දැන් අපි ටිකක් එහාට ගොස් බලමු  වැඩි පාරිභෝජනයක් සහිත චිකන් සොසේජස් එකක්  මා මෙතෙක් සදහන් කල අවස්තාව තෙක් පැමිණෙන්නේ කෙසේද කියා.

කිසිම දෙයක් නැහැ ...  ඒ කියන්නේ ලංකාවේ සොසේජස් නිෂ්පාදනය කරන ප්‍රධාන සමාගම් සියල්ලම පාගේ චිකන් සොසේජස් වෙනුවෙන්  කුඩු කර ඝනකර  පෙට්ටි වල ඇසිරු (Block) කුකුළු මස් කුට්ටි ගෙන්වන්නේ විදේශයෙන් වීමයි .  ලංකාවෙන් සුකරයන් යොදාගන්නා සේම කුකුලන්  යොදාගෙන නිෂ්පාදනය කිරීම අසීරු කටයුත්තක් ඒ වගේම විදේශයෙන් ගෙන්වන මෙම Block ඉතා උසස් තත්වයේ තිබෙනවා .

එහෙත් ඉද  හිට අසන්නට ලැබෙන චිකන් සොසේජසයක් තුල කුඩා චිකන් කටු කැබැල්ලක් තිබීම හෝ කුකුල් පෙද (පිහාටු ) කොටසක් තිබීම වැනි දෑ කලාතුරකින්  විය හැකි දෙයකි . (%1 ).  එහෙත් Pork, Beef or  Mutton  සොසේජ් එකක එවැනි ගැටලුවක් ඇති වීමට කිසිසේත්ම ඉඩක් නැත .

*එසේ ශිත කර කොටස් කරගත් මස් ඉන් පසුව එක් එක් සොසේජ් වර්ග වලට නියමිත සම්මත කුළුබඩු තුන පහ (spice) මිශ්‍ර කර ඇබරීමට ඇබරීමේ යන්ත්‍රයට යොමු කරයි(Bowl chopper machine) පහත රූපයේ ඇත්තේ එවැනි යන්ත්‍රයකි.


මා මෙතෙක් සටහන් කල පොර්ක් සොසේජසය සෑදීම සදහා භාවිතා කරන සම්මත ලැයිස්තුව පහත දැක්වේ .
Pork Belly
Pork cubing
Raw garlic
Crushed pepper
Mace powder
Vacuum salt
Sweet paprika powder
White pepper powder
Macaroon
Modified starch
Sugar
Tari k7

මා මේ දක්වා ඇත්තේ ලංකාවේ ප්‍රධාන සමාගමක වට්ටෝරුවකි , සමාගමෙන් සමාගමට මෙය සුළුවශයෙන් වෙනස් වේ. නිෂ්පාදනයේ ගුණාත්මක භාවය සහ රසය රදාපවතින්නේ මෙම වට්ටෝරු  මතය. එබැවින් මේවායේ රහස්‍යභාවය ආරක්ෂා කරගැනීමට සමාගම් කටයුතු කරයි. (ඒ හේතු මත මා මෙහි අනුපාත දක්වා  නැත)


එසේ සැකසු මිශ්‍රණය සොසේජස් සැකසීමේ යාන්ත්‍රනයට (filler machine) යොමු කිරීම සිදුවන්නේ ඉන් පසුවයි . මෙහිදී  සොසේජස් පිරවීම සදහා (CASING) පොලිතින් කවරයක් භාවිත කරයි.



මෙසේ සකසා ගත් සොසේජ් ඉන්පසු යවන්නේ සොසේජස් උදුන වෙතය . සොසේජ් උදුන  (chamber ) වෙත යවා අවශ්‍ය උෂ්ණත්වය යටතේ පිස ගැනීම සිදුකරයි  (මෙහිදී සොසේජස් අභ්‍යානතර උෂ්නත්වය 72 C ක් විය යුතුය.

 ඉන් පසු සිදුකරන්නේ එම සොසේජස්  නියමිත පරිදි ශිත කිරීමයි  මෙහි ශිත උෂ්ණත්වය 0- +4 ක් වියයුතුයි .

ශිතාගාරයේ පැයදෙකක  පමණ වෙලාවක්  තබා පොලිතින් ආවරණය යාන්ත්‍රයක්  (filling machine) මගින් ඉවත් කර ගැනීම සිදු කරයි. ඉන් පසු  සොසේජස් ඇසිරිම (packing) කල යුතු අතර  ඇසිරු සොසේජ් අධිශීතකරණයක (Blast freezer) ගබඩා කර  තැබිය යුතුය මෙහි ශීතකරණ උෂ්ණත්වය0- +4 ක් විය යුතුය.

ඉන් පසුව තත්ව සුපරික්‍ෂකයන් යටතේ සාම්පල් වශයෙන් පරික්ෂනාගරයක අධිපරික්ෂාවට ලක්වන අතර එතැනදී නිෂ්පාදනයේදී ආහාරයට සුදුසුම තත්වයෙන් නිෂ්පාදනය සිදුවී ඇති බව සහතික කරගැනීම සිදුකරයි.

ඔබේ පරිභෝජනය වෙනුවෙන් සොසේජ් පැකට්ටුවක් වෙළද පොලට නිකුත් වන්නේ ඉන් පසුවය .


-------------------------------------------------------------------------------------------------


ප.ලි 

(1) සමහර සොසේජ් වර්ග කල් තබා ගැනීම සදහා යොදන නයිට්‍රේට් සෝල්ට් පිළිකා කාරකයක් ලෙස පිළිගැනේ, එබැවින් සොසේජ් යනු නිතර පරිභෝජනයට සුදුසු අහරක් නොවේ.. 












You might also like:

Related Posts Plugin for WordPress, Blogger...