11 September 2013

අපූරු ජන්ද අපේක්ෂකයා ..



ජන්දේ ගැන මට මුලින්ම අදහසක් ඇතිවුනේ ඉස්කෝලේ හයේ හතේ පංතිවල ඉන්න කාලේක.. දවසක් ඉස්කෝලේ අහවර වෙලා පාරට බහිද්දිම ඉස්සරහා තාප්පේ වැහෙන්නම ජන්ද පෝස්ටර් අලවල ඒවායේ එවුන්ගේ හිනාව එකෙකුට එකෙක් දෙවෙනි නැහැ, එහෙමත් එකෙක් තමයි  දත් දෙක තුනක් පෙන්නලා හිනා වෙලා උන්නේ අනිත් හැමෝම දත් තිස් දෙකට ආසන්න ගානක් හිනාවෙන් ප්‍රදර්ශනය කරලා තිබුනා .. කොහොම උනත් ඒ හිනා මුණු වලට ඒ කාලේ මම ප්‍රිය කළා.. පස්සේ තමයි දැන ගත්තේ උන්දැල ඒ හිනහා වෙන්නේ අපිටමයි  කියලා .මුලින්ම පෝස්ටර් වලින් හිනහව පෙන්නලා පස්සේ ජන්ද වරමින් පාර්ලිමේන්තුවට රින්ගුවට පස්සෙත් උන්දැල කලේ අපිව හිනස්සන එක විතරමයි...

පස්සෙන් පහු අපේ ගම් පළාතෙත් උන්දැල එක්කෙනා දෙන්නා පුංචි ජන්ද වලට ඉදිරිපත් වෙලා ප්‍රාදේශීය සභා වගේ එව්වට ගියා .. සල්ලිය බාගේ යහමින් තියෙන උන්දැල නම් ඉන් පස්සේ බලය හොයාගෙන දේශපාලනේට පය තිබ්බට මොකද එදා වේල හොයාගෙන කන සමහර උන්දැලත් ඇමතිලා මන්ත්‍රීලා පස්සේ දුවලා ජන්දේ ඉල්ලන්න ඉදිරි පත්වෙන එක ගැන  ඒ කාලේ හැටියට මගේ හිතේ ඇතිවෙලා තිබුනේ ලොකු ගැටලුවක් සමහරුන් තියෙන රස්සාව පවා නැති කරගෙන දේශපාලනේට ගිහින් ගමට වැඩ කරන්න වෙහෙසෙන්නේ ගමට තියෙන ආදරේටයි කියන වැරදි වැටහීම මට ඇතිවෙලා තිබුනට මොකද පස්සේ කාලෙක මම තේරුම් ගත්තා දේශපාලනය කියන්නෙත් හොද බිස්නස් එකක් තමයි කියන එක .. වැඩේ හරියට කලොත් තමන් විතරක් නෙමේ හත්මුතු පරම්පරාවම ගොඩ... ඒ ගමන් ඔය ඉදලා හිටලා පාරක් පාලමක් හැදුවම හොදටම ඇති ..

මෙන්න මේ කාලේ අපේ ගම් පළාතේ අපුරු ජන්ද අපේක්ෂකයෙක් හිටියා උන්දැ ගැන තමයි මේ කතාව ,

එදයි අදයි කියලා වැඩි වෙනසක් නැහැ මම මුන්දැ ගේ නම හරියට කිව්වොත් එහෙම ලංකාවේ ඇතුලත නොඅදුනන කෙනෙක් නැති තරම් . ඒ තරමටම මෙතුමා ජනප්‍රිය ධනවත් ව්‍යාපාර කිහිපයක හිමිකරුවෙක්. ආචාර්ය මහාචාර්ය වැනි නම්බු නාම පට්ටම් වලින් පිදුම් ලැබුවෙක්. ඒ කාලේ මම හිතාගෙන උන්නේ ආචාර්ය වරයෙක් මහාචාර්ය වරයෙක් වෙනවා කියන්නේ මොකක්හෝ විෂයකින් පරතෙරට පැමිණියෙක් කියලයි  ඒත් පස්සේ කාලේක මට තේරුණා ඒක මගේ වැරදි අදහසක් කියලා . මුදල් තියේනම්  ඔය පට්ටම් ඕනෑ තරම් අරගෙන නමට ඉහලින් එල්ල ගත්තෑකි හරිම සරලයි.. 

මෙතුමා එදාට වඩා අද ජනප්‍රියයි කිව්වොත් හරි.. ඒ හේතු කාරණා උඩ මට උවමනාවෙන්ම එක්තරා සීමාවක් සහිත රාමුවක සිට මේ ලිපිය ලියන්න සිදු වෙනවා.. මොකද නැත්නම් සුදු වෑන් රථයක අසුන්ගෙන  යන්න මගේ කිසිම කැමැත්තක් නැහැ නෙවැ.

මෙතුමාගේ අපූරු ක්‍රියා කලාපයක් තිබුනා.. සමහර විට මතු අනාගතයේ ජන්දේ ඉල්ලීමේ බලාපොරොත්තු ඇතිව එහෙම කළා වෙන්නත් පුළුවන් ඒ කොහොම වෙතත් ඒ කරපු දේවල් මෙතුමාටම පමණක් ආවේනික වෙච්ච දේවල් හැටියටම තමයි අදත් මම දකින්නේ... ආයේ ඉතින් මේවා වෙන කවුරුත් කරලත් නැහැ කරන්නෙත් නැහැ වන් ඇන්ඩ් ඔන්ලි අපේ කතා නායකයාගෙන්ම පමණයි .

වෙසක් කාලේට දෙන දන්සැල් වලින් බහුතරයක් උදවිය දැකලා ඇත්තේ කෑම, සිසිල්පැන්, තේ පැන් ඇතුළු බිම වර්ග හෝ මල් පහන් දන්සැල් විතරක් වෙන්ටැති... ඒත් අපිනම් සල්ලි දන් සැලුත් දැක්කා ඒ ඉතින් අපේ මෙතුමාට පින් සිද්ද වෙන්න .. අපරාදේ කියන්න බැහැ අහල ගම් හත අටක ගෑනු මිනිස්සු පෝලිම් ගැහිලා උන්නා දන්සැල වැද  පුදාගන්න  පෝලිම් ගැහිලා උන්නු මිනිසුන්ව අන්ඩු මට්ටු කරන්නත් වෙනමම ආරක්ෂකයෝ කිහිප දෙනෙක්ව යොදවන්න සිදුවුණා   .. නැත්නම් පොඩ්ඩ එහා මෙහා වෙද්දී ගුටි ඇනගෙන හරි පෝලිමේ ඉස්සරහට පැනලා මුල්‍යමය දානය ලබාගෙන පින් අනුමෝදන් කිරීමේ පරම පවිත්‍ර චෙතානාවෙන් හැමෝම මුසපත් වෙලයි උන්නේ ..  ඒ සංදියේ මම හිච්චි ගැටයා නැත්නම් ඔය පෝලිම් කෙළවරක මටත් ඉන්ට තිබුනා ..

 මාරු කාසි අහුරක් දෙකක් එහෙමත් නැත්නම් රුපියල් විස්සේ පනහේ කොල වලින් අතට අහුවෙන තරමේ අහුරක් මේ දන්සැලින් ලබා දුන්නා.. කාලේ හැටියට ඒ ලැබෙන මුදල හොදටම ප්‍රයෝජනවත් පැයක් දෙකක් පෝලිමේ ලැගල උන්නාය කියලා කාටවත් පාඩුවක් නැහැ මේකද මම මේ කියන කාලේ කියන්නේ පාන් රාත්තලක් රුපියල් තුනයි පනහට තුබුන කාලේ .. ඉතින් එහෙව් කාලේක මාරු කාසි අහුරු දෙක තුනක් නෝට්ටු අහුරක් ගන්න ආව මිනිස්සුන්ගෙන් දන්සැල් පෝලිම කිලෝමීටරයකටත් වඩා දික් වුනා කියන එක පුදුමයක් නෙමේ.. අද කාලේ මහා බත් දන්සැලකවත් මම එහෙව් පෝලිමක් දැකලා නැහැ.. කොහොම හරි ඔය වගේ දන්සැලක් අවසන් කරන්නේ මුන්දැගේ අතින් ලක්ෂ හය හතක් දන්දීලා අහවර කලාට පස්සෙයි. ඒකත් විශාල පිනක් නෙවැ.. බලමුකෝ ඒ පින් හේතු වල බල මහිම ඇතිවෙයිද කියලා ජන්දේ දිනන්න.. ඒක දැනගන්න වෙන්නේ අන්තිමට..

ඉතින් ඔය විදියට මහා දාන මාන පිංකම් වලට මෙතුමා ලෝබ නැතුව අත දිගහැරලා වියදම් කරන කාලේ අපේ පල්ලියේ සමිති සමාගමකින් කරන ව්‍යාපෘතියකට මුදල් අඩු පාඩුවක් වෙලා ඒක පියවා ගන්න අපි පිරිසක් සංවිධානය වෙලා  විදී නාට්‍යක් කලා.. මේ නාටකය රගදක්වන්නය කියලා අලුතින් නළු නිලියෝ හොයන්න ඕනේ වුනෙත් නැහැ සමිතියේ සාමාජිකයෝ වෙච්චි අපිම තමයි නළුවෝ උනෙත්...

විදී නාට්‍යක් යැයි කීවට අපි මේක කිසිම විදීයක නම් රගදෑක්වුයේ නැහැ.. ඒකට අපි තෝරාගෙන තිබුනා ධනවත් ව්‍යාපාරික නිවෙස් කිහිපයක්  ඒ නිවෙස් වලට ගොස් ඒ උදවියට විතරයි මේ නාට්‍යය පෙන්නුවේ.. ඉතින් අපිට ඒ ගෙවල් වලින් අත දිග ඇරලා ආධාර කළා.. ඒ අපේ නාට්‍ය ලස්සන නිසාම නොවේ  පල්ලියේ පියතුමා ඒ නිවෙස් කිහිපය දැනුවත් කරලා තිබුන නිසා හැකි පමණින් අපට  ආධාර කරන්නය  කියලා..

අපි මෙහෙම තෝරාගෙන හිටිය නිවෙස් අතරින් අද මගේ කතානායක ප්‍රභූ වරයාගේ බංගලාවත් ප්‍රධාන ඉලක්කයක් වෙලා තිබුනා .. අපිට වෙන් කරලා දීලා තිබුන දවසේ  අපේ කණ්ඩායමමගියා මේ ගෙදරටත් නාට්‍ය රගදක්වන්න. අපරාදේ කියන්න බැහැ උන්නැහේ අපිව බොහොම හොදට පිළිගත්තා විතරක් නෙමේ කෑමෙන් බිමෙනුත් හොදට සංග්‍රහ කරලා එහෙම අන්තිමේදී කිව්වා ...

“හොදයි පුතාලා දැන් එහෙනම් නාට්‍ය කරන්නකෝ ..හැබැයි රගපෑම් නම් සුපිරියට තියෙන්න ඕනේ ...”

උන්නැහේ එහෙම කියලා කට ගන්න හම්බ උනේ නැහැ, අපේ කොයිකටත් පණ්ඩිත ජනකාන්ත අයියා ගේ කට හැමතැනකදිම වගේ මෙතනදීත් අනිත් අයට වඩා ඉස්සරවුනා ..

“ආයෙත් අහලා අංකල්.. දෙන්නම් ආයේ ඇස්ටි හැලෙන්න ...”

අපි බලාගෙන ඉන්නැද්දි උන්නැහැගේ මුණ වෙනස් වුනා ඉස්සෙල්ලා තිබුන කුලුපහ හිතවත් ගතිය වෙනුවට ඒ මුනට ආරුඩවුනේ අපිව බියපත් කරවන තරමේ නපුරු පෙනුමක්.. කම්මුල් කේන්තියෙන් වෙව්ලන්න ගත්තා ..

“අංකල්.. කවුද යකෝ අංකල්.. මම තමුසේගේ අංකල්ද..ඈ ..කතාකරනවා ,

ලොක්කා ජනකාන්ත දිහාටම ඇගිල්ල දික්කරගෙන කෑගහන්න ගත්තා, ජනකාන්ත විතරක් නෙමේ ඒවෙලාවේ උන්දැ යකෙක් වගේ හැසිරුනු හැටියට අපි හැමෝමත්  බයවුනා...

“නෑ..නෑ,, අංකල් නෙමේ මට සමාවෙන්න සර්.සර් .” 

හොදටම බයවෙලා උන්නු ජනකාන්ත අයියා වෙව්ල වෙව්ලා ඒ වෙලාවේ උත්තර  දුන්නු ආකාරය  බලාගෙන හිටි අපි හැමෝගෙම හිත්වලට  දුකක් එක්වුනා කිව්වොත් මම වැරදි නැහැ..

“ඕයි..මිනිස්සුන්ගේ තරා තීරම බලලා ඒ විදියට ගරු නම්බු දීලා කතාකරන්න පුරුදු වෙනවා මින් පස්සෙවත් ..තේරුනාද ?..

“එහෙමයි සර් ..තේරුනා ...”

තව දුරටත් එතුමා නොනවත්වා අපිට බනින අතරේ.. තවදුරටත් ඉවසගෙන ඉන්න පුළුවන් කමක් අපිට තිබුනේ නැහැ ඒක නිසා ඕනෑ දෙයක් වෙත්දෙන් කියලා අපි එහෙම්මම හැරිලා බැස්සා එලියට.. තෙමහල් නිවසේ දෙමහලේ ඉදලා පඩි පෙළ බැහැලා ගේට්ටුව ලගට යනකොටම ආරක්ෂකයෝ දෙන්නෙක් ඇවිත් අපිව නැවැත්තුවා ..

“එක්කෙනෙක්වත් යන්න එපා .. ඔක්කොටම ආයේ මහත්තයා එන්න කිව්වා ..

ආරක්ෂකයෙක් එහෙම කියද්දී නම් මම හිතාගත්තා මේ පාර නම් හොද හෝටලේකින් බඩ කට පුරා කෑමක් දෙන්න තමයි හදන්නේ කියලා .එත් පෙර කල පිනකට  එහෙමවුනේ නැහැ ..

“හරි .දැන් වෙච්ච දේවල් අමතක කරලා ඔයාලා නාට්‍ය කරන්න ...”

අපිත් හිත යට තිබුනා අමනාපේ උඩට නොපෙන්වා නාට්‍යය කරලා ඉවරවෙලා පිටත්වුනා.. අපිට සැලකිය යුතු මුදලකුත් ලැබුනා  ..

ඒ මෙතුමාගේ මාන්නය පෙන්වපු එක අවස්ථාවක්..

ඊට පස්සෙ කාල වලදීත් අපිට සමිති සමාගම් වල අවශ්‍යතාවයන් වලට එතුමාගේ කාර්යාලයට යන්න වෙච්ච අවස්ථා තිබුනා , එත් පිරිමි පාර්ශවයේ කෙනෙක් ගිය අවස්ථා වලට වැඩේ සාර්ථක වුනේ නැහැ දවස් තුන හතර රස්තියාදු වෙන්නවුනා ඒකටත් අපි සාර්ථක පිලියමක් හොයාගත්තා ඒ තමයි සමිතියේ හිටිය හොදට ඇහැට කනට පේන තරුණියක්ව මේ වැඩේට යොදාගත්ත එක. වැඩේ සාර්ථකයි ඉන් පස්සේ දවස් ගණන් රස්තියාදු වෙන්න වෙච්ච වැඩ එක දවසෙන් අහවරයි.. ඒක හරි සිම්පල් ප්ලෑන් එකක් .. 

ඉදලා හිටලා ගමේ පාරේ තොටේදී මෙතුමාව දැක්කොත් ආයේ දෙපාරක් නෙමේ  තුන් හතර පාරක් හැරිලා බැලෙනවා.. වැරදියට වටහා ගන්න ඕනේ නැහැ ඒකටත් හේතු  තියෙනවා . එක්කෝ මෙතුමා ඉන්නේ අස්පයෙක් පිටේ, එහෙම නැත්නම් අස්ප කරත්තෙක හෝ හැඩ වැඩ දැමු  අන් දිග ගොන් කරත්තෙක.. ඉද  හිට අලියෙක් පිටේ යන අවස්ථාද නැතුවම නෙමේ..  

ගමන බිමන එහෙම වෙද්දී නිවසේ තියෙන බොහොමයක් බඩු භාණ්ඩ එහෙමත් රජ සිටු වරුන්ගේ හා සමානව නිර්මාණය කරවලා තිබෙනවා යැයි පැවසෙනවා... ඒකට හේතුව මෙතුමා රජවරු සිටුවරු නිලමේ වරුන්ට වැඩි ඇල්මක් දක්විමම තමයිලු  .

ඒ බව දන්නා බංගලාවේ ආවතේව කාරයෙක් උපායක් යොදාගෙන මඩිය තර කරගත්තු කතාවකුත් තියෙනවා (ලු).. මිනිහා කරලා තියෙන්නේ මෙතුමා එක්ක ඉද  හිට කතාවට වැටෙන්න අවස්තාවක් ලැබුන ගමන් මෙතුමාට රජතුමණි කියන ගෞරව නාමයෙන් ආමන්ත්‍රණය කිරීමට පෙළබිම.. එහෙම අමතන වාරයක් පාසා මුදල් නෝට්ටු කිහිපයක් ආවතේව කාරයාගේ අතේ තියන්නටත් මෙතුමා පසුබට වෙන්නේ නැහැලු ..

දවසක් මෙහෙම මෙතුමාට රජතුමණි කිය කියා ආමන්ත්‍රණය කර කර හිටි ආවතේව කාරයාට මොකක්දෝ උවමනාවකට මෙතුමාගේ බිරින්දෑ කතාකරලා තියෙනවා .. ආවතේව කාරයත් ගිය ගමන්ම අර ගැම්මෙන්ම ඇයි බිසවුන්නාන්සේ මට එන්න කිව්වේ කියලා අහලා... ඔය රජ කතාව ගැන අමනාපෙන් හිටිය බිරින්දෑට ඒක පාරම මේ මිනිහා බිසවුන්නාන්සේ කියපු එකට අසුහාරදාහටම නැගල “කොහෙද මනුස්සයෝ මෙහෙ රජවරු බිසෝවරු ඉන්නේ ..උබටත් පිස්සු උබේ මහා එකාටත් පිස්සු ...” කියලා ආවතේව කාරයව පන්නගෙන තියෙනවා..     දවසක් හොදම නැටුම් තෙල් වලින් සප්පායන් වෙච්ච ආවතේව කාරය ඕක ගම පුරාම කියව කියව ගියාලු හරි උජාරුවෙන්..


කොහොමින් කොහොමින් හරි පුංචි ජන්දයක් ලංවෙද්දි මෙතුමාත් ඒකට ඉල්ලුම් කලා.. බොහෝ උදවියට වගේම ධනයෙන් අඩුපාඩුවක් නැතිවුනාම බලය ලබාගැනීමේ ආශාව කියන සම්මතය තමයි මෙතනටත් බලපෑවේ  එහෙම නැතුව මෙතුමා දේශපාලනයෙන් හරි හම්බ කරගන්න  අදහසකින් ජන්දෙට ඉදිරිපත්වුනා කියලනම් හිතන්න අමාරුයි .

මෙතුමා ජන්දෙට ඉදිරිපත්වුනදා ඉදලම මේ බංගලාව මිනිස්සුන්ගෙන් පිරුනා කොයිවෙලෙත් මිනිස්සු හත් අටසීයක් ගෙදර ඉස්සරහා වත්තේ හිටියාමයි .. පෝස්ටර් ගහන්නද කැන්වස් යන්නද ස්ටේජ් ගහන්නද ඕනේ තරම් සෙනග උදව් කාරයන්ගේන්නම් කිසිම අඩුපාඩුවක් නොතිබුන ජන්ද අපේක්ෂකයෙක් කිවොත් හරි ... පෝස්ටර් වලින් පැය කිහිපයක් ඇතුලත මුළු පළාතේම තියෙන තාප්ප බිත්ති ටික වනසලා දන්නා පුළුවන් විදියේ කඩිසර ජනකායක් හිටියේ කොයිතරම් සෙනගක් හිටියත් මෙතුමා ඒ ඉන්න හැමෝටම හොදට සැලකුවා ..තුන් වේල කන්න බොන්න දුන්නා. ඒ විතරක්නම් මදෑ හැම කෙනාටම දෙතුන් සීය ගානේ බෙදලත් දුන්නා දවස ගානෙම මේ තරම් සෙනගක් පැල පදියම් වෙන්න හේතුවත් ඒකම තමයි .

මේ අයට මුදල් තෑගී බෙදලා දුන්නේ හරි පරිස්සමට කාවවත් මග නොඇරෙන්න ඒකට හොද ක්‍රම වේදයක් භාවිතා කලා මෙතුමා,  ඒකට යොදාගෙන තිබුනේ ඇතුල් වෙන්න සහ පිට වෙන්න දොර දෙකක් සහිත කාමරයක් එක දොරකින් පෝලිමේ සෙනග ඇවිත් එකා ගානේ කාමරේට ඇතුල්වෙලා මුදල් හෝ  තෑගී අරගෙන එහෙම්මම අනිත් දොරෙන් පිට වේලා යනවා.. කටවත් අසාධාරණයක් වෙන්නෙත් නැහැ හැමෝටම ලැබෙනවා එක්කෙනෙක්ට දෙපාරක් එන්නත් බැහැ.. කොහොමද වැඩේ ..

කොහොම හරි ජන්ද දිනය ලංවෙද්දි මෙතුමා ගණන් හදලා අනුමාන කලා මනාප මෙච්චරක් විතර ප්‍රමාණයක් අනිවාර්යෙන්ම ලැබෙන්න ඕනේ කියලා .. මම හිතන්නේ හැම අපේක්ෂකයම එහෙම බලනවා ඇති . මෙතුමා අරගෙන බැලුවම දැනට සහයට ඉන්න ජනතාවම විතරක් මනාප තුන ගානේ දුන්නොත් එතනම මනාප බරගානක් තියෙනවා , ඒ විතරක්ඈ උන්දැලගේ ගෙවල් වල ඉන්න මිනිස්සුන්ගේ මනාප තව ගමේ නිතර යන එන උදවියගේ මනාප එහෙම එකතු කරලා බැලුවම මෙතුමා දැනටම ජන්දේ දිනලා ඉවරයි මනාපම තියෙන්න ඕනේ බරගානක්.. ඉතින් මෙතුමා බොහෝම සතුටින් ජන්දේ දවස ගතකලා ..

පහුවදා ජන්ද ප්‍රතිපල බලද්දී මෙතුමා උඩින්ම පරාදයි..අර කියන්නේ ඇපත් නැහැ කියලා ආන්න එහෙමයි . ලැබිලා තියෙන මානප සංක්‍යාව ගණන් හදලා බලපුවාම ලගම හිටීය සහායකයන්ගෙන් ලැබුණානම් තියෙන්න ඕනේ ගානටත් වඩා මනාප සංක්‍යාව අඩුයි.. මගේ හිතේ අර ආඩි හත්දෙනාගේ කැද හැලිය වගේ වැඩක් වෙලා තියෙන්නේ අරූ දායි මූ දායි කිය කියා හිතාගෙන හැමෝම වෙන වෙන උන්ට ජන්දේ දාල ...

කොච්චර අන්ත පරාජයක් ලබලා හිටියත් මෙතුමා මුනෙන් දුකක් කනගාටුවක් පෙන්නුවේ නැහැ කාටවත් ජන්දෙන් පස්සේ දවසෙත් වෙනදා වගේම හැමෝටම එන්න කියලා කිව්වා තෑගී දෙන්න .. මිනිස්සුත් ඉතින් ඔක්කොම ඇවිත් වෙනදා වගේම පෝලිමේ එක එකා වහලා තිබුන දොරෙන් කාමරේට ඇතුල්වෙලා එහා පැත්තේ දොරෙන් පිට වේලා එහෙම්මම පාරට බැහැලා ගියා... ඒත් වෙනදා වගේ සන්තෝෂ පාටක්නම් මුණු වල පෙනෙන්න තිබිලා නැහැ..

මොනවාද දන්නවද අන්තිමට දීලා තිබුණ තෑග්ග...






මුණ  පුරෝලා කම්මුල් පාරක්...



වෙනදා වගේම කාවවත් මග නොහැර හැමෝටම හොදට රිදෙන්න පාර දීලා තිබුනා .. ගුටි කාලා එලියට බැස්ස උන් ආයේ කාටවත් කියන්න ගියෙත් නැහැ ගිමිට කම්මුල අතගාගෙන ගෙදරම ගියා මිසක ...

ඔන්න ඔහොමයි පුංචි ජන්දයක් අහවරවුනේ එයින් පස්සේ මෙතුමා ආයේ කවදාවත් ජන්දේ ඉල්ලන්න ගියේ නැහැ ඒ මේ වෙච්ච නව නින්ගිරාව මතකේ තියෙන නිසාම වෙන්න ඇති , අද මෙතුමාගේ එක වියාපාරික ව්‍යාපෘතියක් නිසා කුඩා ළමුන් පාසල් සිසුන් හා තරුණ තරුණියක් ප්‍රයෝජනයක් ලබනවා සතුටු වෙනවා අන්න ඒ වැඩේටනම් මමත් මනාපයි

________________________________________________________________
ප.ලි :- මෙතුමා කව්දැයි ඉගියකින් හෝ අදුනාගත් කෙනෙක් සිටිනම් කෙලින්ම නම නොකියා ඉගියක් පමණක්ම කරන ලෙස ඉල්ලා සිටිමි.  
















06 September 2013

උමතුවක වියරුව...



ධාරාණිපාත වර්ෂාවෙන් තෙත බරිතව  දිව ආ මිනිසා  අසල ඇති විශාල නිවසේ  වසා ඇති ගේට්ටුවේ එල්ලී ඇතුලට පැනීමට කිහිප වරක් උත්සහ කළේය . අවසානයේ ඔහුගේ උත්සහය සාර්ථකවී  ගේට්ටුවේ උඩ යකඩ කූරක පැටලුනු කබායද ඉරාගෙන ගේට්ටුව පාමුල වැස්සෙන් සැදී ඇති මඩ ගොහුර වෙතටම ඇද වැටුණි .

“ෂිට් කාලකන්නි වැස්ස මාව හොදටම තෙමුවා ..”

වැස්සට සාප කරමින් කොරගසමින් විශාල නිවසේ දොර වෙත පැමිණි මිනිසා  අගුලු ලා ඇති දොරට තඩි බාන්නට පටන් ගත්හ .. ඔව් ඇත්තෙන්ම එය දොරක් ව්වෘර්ත කරගැනීමට කරන සාමාන්‍ය තට්ටුවක් නොව තඩි බෑමකි ...

“හෙලෝ ..කවුරුවත් ඉන්නවද .., මම මේ වැස්සෙන් තෙමිලා ඉන්නේ හොදටම .. අනේ කවුරු හරි ඉන්නවනම් මේ දොර ඇරලා මාව ඇතුලට ගන්නවද ..ප්ලීස් ,

දොරට තඩි බෑමෙන් නොනැවතුන මිනිසා ඉන් පසුව ජනෙල් වලටද ගසමින් නිවස වටේටම  ඇවිදින්නට  පටන්ගත් අතර තොර තෝංචියක් නැතිව තනියම කියවන්නටද විය .

මේ ගෙදර කවුරුවත් නැද්ද...නැත්නම් මගේ වෙලාව අද අන්තිම නරකයි .., ගෙදර කවුරු හරි ඉදගෙන දොර අරින්නේ නැතුව ඉන්නවානම් එහෙම කරන්න එපා..ඒක හරිම කැත වැඩක්..ඔව්...හරිම කැත වැඩක්..

වරින් වර ජනෙල් වලට ගසමින් ඇවිද ගිය මිනිසා එක වරම දකින්නේ නිවස ඇතුලේ සිට ජනේලයකින් තමන් දෙස බලා  සිටිනා තරුණියක්...

“ඔක් . මැඩම් කරුණාකරලා මේ දොර ටිකකට අරින්න ..

ක්ෂනිකයෙන්ම ඒ රුව නැවතත් අතුරු දහන විය

“මැඩම් මම දැක්කා මැඩම් මගේ දිහා බලාගෙන ඉන්නවා... අනේ මැඩම් මේ දොර ටිකක් අරින්න. මම හොදටම තෙමිලා ඉන්නේ .. මේ හීතල මට ඔරොත්තු දෙන්නේ නැහැ ..ප්ලීස් මැඩම්.. ප්ලීස්

එහෙත් නිවස තුලින් කිසිදු ශබ්දයක් හෝ ප්‍රතිචාරයක් නොලැබුන තැන ... මිනිසා දිගින් දිගටම කන්නලව් කිරීමට පටන් ගත්තේය .

“අනේ මැඩම් මම හෘර්ද රෝග කාරයා.. මේ සීතලත් එක්ක මගේ අසනීපය වැඩි වේගෙනයි එන්නේ ..අනේ ප්ලීස් මැඩම්.

මද වේලාවකට පසු දිගින් දිගටම කහින්නට වූ මිනිසා පසුව එතනම බිම වාඩිවී.. මහා හයියෙන් කෙදිරි ගාන්නට පටන් ගත්තේය..

එත් සමගම දොර ඇරුණි... ඇරුන දොර අතරින් බියපත් මුහුණක් සහිතව බලා සිටින තරුණියක් පෙනෙන්නට විය

එත් සමගම නැගිට සිටගත් මිනිසා තරුණියවද පසකට තල්ලුකර දිවගොස් සාලයේ තබා ඇති සැටියේ වාඩිවිය.. පසුව නැවතත් දොර වසා දැමු තරුණිය සෙමින් ඇවිද විත් ඔහු අසල සිට ගත්තේ මේ සිදුවූදේ අදහාගත නොහැකි අයුරිනි ..

“ඇයි මැඩම් හිටගෙනම ඉන්නේ වාඩි වෙන්න “  ඔහු අසල ඇති අසුනක් වෙත අත දික්කර පෙන්වා සිටියේය .

“නෑ.. කමක් නැහැ ,

“මැඩම්ගේ ගෙදර මම ඉදගෙන ඉන්නකොට මැඩම් හිටගෙන ඉන්න එක මගේ හිතට හරි මදි වාඩි වෙන්න මැඩම්.”

“ඔහේ දැන් අසනීපෙන් හිටියේ ..?

“හක්..හක්. හා .. ඒකද මේ මැඩම් පුදුම වෙලා වගේ බලන්නේ!!!  ..හක්..හක් , මට ඉහෙන් බහින අසනීපයක් නැහැ මැඩම්.., ඒක පොඩි රගපෑමක්..  ඔව්  දොර ඇරගන්න කරපු රගපෑමක් , නැත්නම් මැඩම් කවදාවත් මේ දොර අරින්නෙත් නැහැ මට ඇතුලට එන්න වෙන්නෙත් නැහැ .. එහෙනම මම තාමත් එළියේ සීතලේ .. හක් හක් ..කොහොමද මැඩම් මගේ රගපෑම් හොදයි නේද ඒ කාලේ මම හොද වේදිකා නාට්‍ය නළුවෙක් .. මැඩම් මට අහුවුනා.. හක්..හක්.. හා ...


අමුත්තා තොර තෝංචියක් නැතිව කියවන්නට පටන් ගත්තේය.. කියවන අතර මහා හඩින් හිනහා වෙමින් විසිළු ආකාරයක් පෙන්වමින් රගදැක්විම  උමතු රෝහියෙකුගේ හැසිරීමකට සමාන විය. මද වෙලාවක් ඔහු දෙස බලා සිටි තරුණිය අප්‍රසාදයක් මුවට නංවාගෙන එතැනින් මෑත් වී ය ,


“ඔක් ..ඇයි මැඩම් යන්නේ.. මැඩම්ගේ මූනත් හොද නැහැ , ඇයි මම නරක දෙයක් එහෙම කිව්වද ..හක් හක්, ගනන් ගන්න එපා මැඩම් මගේ කට එච්චර හොද නැහැ .. මැඩම් වගේ තරුණ කාන්තාවක් ඉස්සරහදී කොහොමත්ම හොද නැහැ..හක්..හක්..හා ,  සමාවෙන්න මැඩම්..

“හරි ඒකට කමක් නැහැ ...”

“මැඩම් මම මේ අහන්න හිටියේ , මේ ගේ අයිති මෙන්ඩිස් මහත්තයාට නේද .. මම මෙතනින් යන එන ගමන් දැකලා තියෙනවා මෙන්ඩිස්  මහත්තයා මේ හෙදර ඉන්නවා ඒත් මම කවදාවත් මැඩම්ව දැකලා නැහැ..

තරුණිය ඉවත බලා සිටියා මිස ඔහුගේ පැනය ඇසුන බවක් පෙන්වුයේ නැත..

“මැඩම්.!!! .මැඩම් මෙන්ඩිස් මහත්තයාගේ දුවද ..” අමුත්තා  නැගිට උස් හඩින් ඇසු විට ඉවත බලා සිටි තරුණිය ඔහු දෙසට හැරුණි අමුත්තාට ඇයගේ මුහුණේ හැගීම් තේරුම් ගැනීමට අපහසුවුයේ නැත ..

“ඔහ්, මට සමාවෙන්න මැඩම්..හරි ..හරි මට තේරුනා මැඩම්  මෙන්ඩිස් මහත්තයාගේ බිරිද වෙන්න ඕනේ . මෙන්ඩිස් මහත්තයාත් වයසට ගියාට තාම කොල්ලා වගේනේ ..හක්.හක්… ඒක නෙමේ මැඩම් කෝ මෙන්ඩිස් මහත්තයා ඉන්නවද ?,

“නැහැ ...”

“හක්..හක්.. ඒක හොදයි මෙන්ඩිස් මහත්තයා හිටියනම් මට මෙහෙම මගේ ගෙදර වගේ ඉන්න බැහැනේ.. ඔන්න මැඩම් මම අද වැස්ස පායනකන්ම මෙහේ තමයි තරහා නැහැනේ ..

“කමක් නැහැ ..”

“මැඩම් වැඩි කතා බහක් නැහැ නේද .., එහෙම අයත් එක්ක ඉන්න එක හරිම කම්මැලි මට හරිම බෝරීන්.. අනේ මැඩම් තරහා නැතුව ඔය ටෙලිවිෂන් එකවත් දානවද ...”


තරුණිය සෙමින් ඇවිද ගොස් ටෙලිවිෂනයේ දුරස්ථ පාලකය ගෙන ටෙලිවිෂනය ක්‍රියාත්මක කරයි.. ඒත් සමගම අසුනෙන් නැගිට ඈ වෙතට ආ අමුත්තා ඇගේ අතින් දුරස්ථ පාලකය උදුරාගෙන නැවත අසුන්ගෙන..  දුරස්ථ පාලකය මගින් නාලිකා එකින් එකට මාරු වී අවසානයේ එක් නාලිකාවක යමින් තිබු ප්‍රවෘර්ති යක් වෙත අවදානය යොමු කරයි..

නැවතත් විශේෂ ප්‍රවෘර්ති,

අද දහවල් කාලයේ ඩික්මන් ප්‍රදේශයේ නිවසක තනිව විසු ව්‍යාපාරිකයෙකුව අමානුෂික ලෙස තියුණු ආයුධයකින් කපා කොටා මරා දමා ඇත.. එම දේහය පරික්ෂා කිරීමේදී හැගී යන්නේ එය විකෘර්ති මානසික රෝගියෙකුගේ ක්‍රියාවක් බවයි.. තව දුරටත් මේ පිලිබදව පොලිස් පරීක්‍ෂණ පැවැත්වෙන අතර.. එම ප්‍රදේශයේ පුද්ගලයන් හට අවදානයෙන් සිටින ලෙස දන්වා සිටිමි..

නැවතත් ප්‍රවෘර්ති සුළු වෙලාවකින් ..

“හක් හක් හා.. මිනී ගොඩ ගැහෙනවා, මැඩම් කැමති නැද්ද මිනී මැරුම් බලන්න.. මම නම් හරි කැමැති .හක්..හක්.. මම කිව්වේ මේ මිනීමැරීම් සහිත චිත්‍ර පට වලට... අපි දිගටම ටීවී එක බලමු මැඩම්,  මේක කොහොමද පොලිසිය හොයාගන්නේ කියලා ... , මම නම් කියන්නේ පොලෝසිය මේක හොයාගන්නේ නැහැ , මැඩම්ගේ අදහස මොකක්ද මේ ගැන ..?

එසේ කියා තරුණිය දෙස පිළිතුරක් අපේක්ෂාවෙන් බැලු අමුත්තාට දකින්නට ලැබුනේ තවමත් ටෙලිවිෂනය දෙස නෙත් යොමාගෙන  දැඩි බියට පත්වී ඇති ආකාරයෙන් වෙව්ලමින් සිටින තරුණියයි ..

“ඔහ්..!! ඇයි මැඩම් මේ බයවෙලා.. බය වෙන්න එපා මැඩම් මම දන්නවා මැඩම් දැන් හිතන දේ.. ඒ මිනී මරුම කලේ මම කියලා නේද මැඩම්  හිතන්නේ හක්..හක්.හා.. මැඩම්ගේ හිතීමේ නිදහසට මම බාදා කරන්නේ නැහැ ඒත් මම මැඩම්ට කිසිම කරදරයක් කරන්නේ නැහැ කියලා පොරොන්දු වෙනවා  බයවෙන්න එපා මැඩම්..

අමුත්තා කතා කරන අතරම තරුණිය සෙමෙන් සෙමෙන් පිය මැන  ගොස් ස්ථාවර දුරකථනයක් තබා ඇති මේසයක් අසල නතර වී රිසිවරය අතට ගත්තෙත්  ඒත් සමගම සෝපාවේ අසුන්ගෙන හුන් අමුත්තා එය දැක අසුනෙන් නැගිට ඒ වෙත දිව ආවෙත් එකම මොහොතකදීය .

“කරුණාකරලා ඔය වැඩේ කරන්න එපා මැඩම්..  මැඩම් හදන්නේ  පොලිසියට කෝල් කරලා  ඒ මිනීමැරුම කලේ මම කියලා කියන්න නේද ..එහෙම කලොත් ..හක්..හක් ..හා .., නෑ මම පොරොන්දු උනා මැඩම්ට කරදරයක් කරන්නේ නැහැ කියලා. ඒ නිසා මැඩම් මගේ ඒ පොරොන්දුව කඩන්න වෙන විදියේ වැඩක් එහෙම කරන්න හදන්න එපා..

“නෑ මම පොලිසියට කෝල් කරන්නේ නැහැ ....”

එහෙනම් ගැටලුවක් නැහැ , මම මැඩම්ව විස්වාස කරනවා ..”

එසේ පැවසූ අමුත්තා නැවතත් හැරී පෙර සිටි අසුන වෙතම ගමන් කරන අතර තරුණිය දුරකථනය ගෙන අංක කිහිපයක් කරකවා ඇමතුමක් ගෙන සිහින් හඩින් කතා කරන්නට පටන් ගත්තේය. අසුන වෙත ගොස් වාඩිවී දුරකථනයට පිළිතුරු දෙමින් සිටින තරුණිය දෙස මද වෙලාවක් බලා සිටි අමුත්තා හඩක්  නොනැගෙන සේ නැගිට ඇයට නොඇසෙන සේ ඇවිද ගොස් ඈ පිටුපසින් සිට ඈගේ කතාවට කන් යොමුකර න්නට විය..

“මම තනියම ඉන්නේ අම්මා .. මට හරි බයයි  මේ මිනිහා හරි අමතුයි .. කථාවත් වෙනස්..ප්ලීස් අම්මා මේ වෙලාවේ මාව තනි කරන්න එපා .. මට හරි බයයි ..

ඈගේ කතාව හොරෙන් අසා සිටි අමුත්තා ඇයට නොඇසෙන සේ හිමින් ඇවිද ගොස් නැවතත් පෙර සිටි  අසුනේම හාන්සි විය .. , ඒත් සමගම ක්‍රියාත්මකව තිබු ටෙලිවිෂනයේ නැවතත් මිනීමැරුම ගැන  ප්‍රවෘර්ති යක්  විකාශය වෙන්නට පටන් ගත්තේය ..

නැවතත් විශේෂ ප්‍රවෘර්ති ,

ඩික්මන් ප්‍රදේශයේ ඝාතනයට සමාන ඝාතනයක් එයිට පැය කිහිපයකට  පසුව එයිට නුදුරු තවත්  ස්ථානයක සිදුවී ඇති බවට සාක්ෂි ලැබී තිබේ . මේ මරණ දෙකම එකම ආකාරයට කපා කොට ඝාතනය කර ඇති බැවින් එකම පුද්ගලයෙකුගේ ක්‍රියාවක් බැව් අනුමාන කල හැක. මෙය මානසික රෝගී උමතු පුද්ගලයෙකුගේ මිලේජ්ජ ක්‍රියාවක් බවට අනුමාන කරන අතර  එම මිනීමැරුමේ රූපරාමු තව ස්වල්ප මොහොතකින් විකාශය කෙරේ 

නැවතත් ප්‍රවෘර්ති සුළු වෙලාවකින් ..බලාපොරොත්තු වන්න ,

ප්‍රවෘර්ති ඇහෙන ඇහෙන පාරට මැඩම් වෙව්ලනවා.. ඒ උනාට මම හරි ආසයි මේ වගේ ඉන්ටරෙස්ට් නිව්ස් එකක් බලන්න.. ,  බය වෙන්න එපා මැඩම්..මම කිව්වනේ මගෙන් මැඩම්ට කිසිම කරදරයක් වෙන්නේ නැහැ කියලා ... හක් ..හක්.., හරි මැඩම් ගිහින් මේ බයයි සීතලයි දෙකම නැති වෙන්නත් එක්ක හොද කෝපි කෝප්පයක් හදාගෙන එනවද ..

තරුණිය කිසිත් නොපවසා සෙමෙන් සෙමෙන් මුළුතැන්ගෙය දෙසට පියමනින අතර අමුත්තා තවමත් නොනැවති වසින මහා වර්ෂාව දෙසට නෙත් යොමයි ...

මද වෙලාවක් ගොස් මුළුතැන් ගෙයි සිට හැරෙන තරුණිය දකින්නේ තමන් අසලම සිටගෙන සිටින අදුරු සෙවනැල්ලකි ..ඒත් සමගම බියවී මහා හඩින් කෑ ගසන ඇය අතින් දියරයක් සහිත කෝප්පය බිම වැඩි සී..සී කඩ විසිරේ ...,

“අඃ මැඩම්... මැඩම්.. කෑ ගහන්න එපා මේ මම.. මැඩම් පරක්කු ඇයි කියලා බලන්නයි මම ආවේ .. මට සමාවෙන්න .

තවමත් දැඩිව බියවී ඇති තරුණිය වේගයෙන් හුස්ම ගන්නා අතර දියෙන් ගොඩ දැමු මත්සයෙකු සේ වෙව්ලන අයුරු අමුත්තා නිරීක්ෂණය කළේය ,

“මැඩම් බොරුවට බය වෙනවා.., මම කිව්වනේ මගෙන් මැඩම්ට කරදරයක් නැහැ කියලා.. අපරාදේ කෝප්පෙත් බිදිලා.. කමක් නැහැ..   මැඩම් කෝපි කෝප්පයක් හදාගෙන  එන්න එතකන් මම ගේ ඇතුලට වෙලාම ඉන්නම් ..

නැවත  සිටි ස්ථානයටම පැමිණි අමුත්තා ටෙලිවිෂනයේ දුරස්තපාලකය ගෙන නාලිකා කිහිපයක් මාරු කර බලා නැවතත් සුපුරුදු නාලිකාවේම නතර කර .. ගේ තුල මදක් සක්මන් කරමින් සිට නැවත මුළුතැන්ගෙය දෙසට හැරුණි .

“මැඩම්!!!..මැඩම්ට කෝපි කෝප්පයක් හදන්න ගොඩාක් වේලාව යනවා නේද ..හක්..හක්.. කමක් නැහැ හිමිට හදාගෙන එන්න මම ඔය පැත්තට එන්නේ නැහැ .මැඩම් බය වෙනවනේ .හක්. හක්  අහ්හ් ඒක නෙමේ මැඩම් එතකන් මම මැඩම්ලගේ දුරකථනය ටිකකට පාවිච්චි කලාට කමක් නැහැනේ ..

එසේ පැවසූ අමුත්තා දුරකථනය සහිත මේසය දෙසට ඇවිද ගොස් රිසිවරය අතට ගෙන අංකයක් කරකැවිය..

“ඔහ්..මේ ෆෝන් එක කැඩිච්ච එකක්නේ... තවම වයර් එකට සම්බන්ද කරලත් නැහැ .. එතකොට කොහොමද මැඩම් මේ ෆෝන් එකෙන් අම්මට කතා කලේ ..
“මැඩම්..මැඩම්..

කලබලවූ මිනිසා දුරකතනයද අතින් ගෙන මුළු තැන්ගෙය දෙසට යෑමට හැරුනා පමණි දුරකථනය තබා තිබු මේසය යටින් ගලා ඇවිත් තිබු දියරයක් පයට පෑගී ඔහු එතැනම ලිස්සා වැටුණි..

“ඔහ් මයිගෝඩ් බ්ලඩ් ...

අමුත්තා ලේ පාර ගලා එමින් තිබු දෙසට නැගිට ඇවිද යන විට ඔහුට දකින්නට ලැබුනේ මේසය කෙලවරේ අයිනක උඩු බැලි අතට වැටී සිටින මිනිසෙකි  කපා කොට අමානුෂික ලෙස ඝාතනය කර තිබුනද ඔහු කවුදැයි හදුනා ගැනීමට අමුත්තාට අපහසු වුයේ නැත ..

“ දෙයියනේ මෙන්ඩිස් මහත්තයා ..ඔයාට කවුද මේ අපරාදේ කලේ ...

ඒත් සමගම ටෙලිවිශනයේ නැවතත් ප්‍රවෘර්ති ආරම්භ විය

නැවතත් විශේෂ ප්‍රවෘර්ති ,

ඩික්මන් ප්‍රදෙසට නුදුරුව අමානුෂික ලෙස තියුණු ආයුධයකින් කපා කොටා ඝාතනය කර තිබු  මනුෂ්‍ය ඝාතනයේ රූප රාමු දැන් අප වෙත ලැබෙමින් පවතී .. ඝාතකයා එම මරණය සිදු කරන ආකාරය එම නිවසේ ආරක්ෂක කැමරාවක සටහන්ව ඇති දර්ශනයක් අප වෙත ලැබී ඇත..පහතින් දර්ශනය වන්නේ එම රූප රාමුවයි ..

තැතිගෙන සිටි අමුත්තා හුන් තැනම සිට එම රූප රාමු නිරීක්ෂණය කළේය ...

“ඔහ්..දෙයියනේ මැඩම් ඔයා ...

ඔහුට කියන්නට ලැබුනේ එපමණකි ..කන අසලින්ම ඇසුණු සියුම් සබ්දය දෙස හිස හරවා බැලු ඔහුට දැකගන්නට ලැබුනේ .. ඔහු පිටුපසට වී  තියුණු මන්නයක් අතැතිව සිටින තරුණියගේ වියරු මුහුණයි .. ඔහු ජිවිතයේ දුටු අවසානම දසුන එයම විය ..

නැවතත් ප්‍රවෘර්ති

 රූපරාමු වලට අනුව ඝාතකයා තරුණියකි.. ඈ දරුණු උමතු රෝගයකින් පෙලෙන අතර මානසික රෝහලකින් පැන ආ යුවතියක් බව වාර්තාවේ ..  ඈ ගැන තොරතුරත් ඇතොත් කරුණාකර ලගම ඇති පොලිසියට දන්වන්න ..

නැවතත් ප්‍රවෘර්ති  සුළු වෙලාවකින් ..බලාපොරොත්තු වන්න ,

එහෙත් ඒ වන විටද අමුත්තාගේ අවසන් හුස්ම පොද වාතලයට මුසුවී අවසන්ය...

















You might also like:

Related Posts Plugin for WordPress, Blogger...