පොලිස් කුඩුවක සිට විස්සයි විස්ස තරගය නැරබුවෙමි...

විස්සයි විස්ස තරගය බැලීමට මා උදේ සිටම සුදානම් උනේමී .. ඒ වෙනුවෙන් ප්‍රදේශයේ හොදම තිරය දමා ඇති අවන්හල සොයාගත්තේ වඩාත් පැහැදිලිව තරගය බලා  ගැනීම සදහාය.. එහෙත් තරගය දිනා ගැනීමට ලංකා කණ්ඩායම අවාසනාවන්ත වූ තරම්ම මමද ලංකාව ක්‍රීඩා කරන ආකාරය දැක බලාගැනීමට නොහැකි වන තරමටම අවාසනාවන්ත උනේමී.. මේ දිග හැරෙන්නේ ඒ අවාසනාවන්ත සිදුවීමය..

හවස් යාමයේ සියල්ල සුදානම් කර මිතුරාට අයිති මෝටර් රථයෙන් අවන්හල වෙත ගියෙමු.. අප යන විට අවන්හලේ අති විශාල තිරය ඉදිරිපිට ක්‍රීඩා ලෝලීන්ගෙන් පිරි ඉතිරි තිබුණි.. එය ක්‍රීඩා පිටියට දෙවැනි නැත . අප කලින් වෙන්කරවා ගත් ස්ථානයට ගොස් තරගය නරබන්නට පටන් ගත්තෙමු...

තරගය නරබන අතර තුර ඇතිවන පිපාසය සංසිදවා ගැනීමට බියර් බෝතල් කිහිපයක්ද අප සතුව තිබුණි ..

මුලින්  ලංකාව හොදින් ක්‍රීඩා කලේය.. හොදින් පන්දු යැව්වේය.. (මාලිංග හැර ) විකට්ටු ගත්තේය . අපේ කොලුවන්ගේ බෝල වලට කොදෙව්වන් ඇබරෙන හැටි දැක මම ප්‍රීතියෙන් පිනා ගියෙමි...

ඒවිට මට වැඩි වැඩියෙන් පිපාසය ඇතිවිය... එය සංසිදවීමට මම වැඩි වැඩියෙන් බියර් බිවෙමි ..

මද වේලාවකින් මාගේ තවත් මිතුරෙක් අපේ ආරාධනයෙන් එතැනට  පැමිණුනේය . ඔහු පැමිණ සිටියේ පල්සර් වර්ගයේ මෝටර් බයිසිකලයකිනි .. ඔහුද අප සමග එක්වී ජයපැන් බොමින් තරගය නැරබුවේය..

අප සිතා සිටියේ ලංකාව ගේමක් නැතිවම දිනාවී කියාය .. එබැවින් එතැන එකම විනෝද සාගරයක් වී තිබුණි... ක්‍රීඩා පිටියේ සිටිනවා වැනිමය..

මද වෙලාවකින් තවත් මිතුරෙක් ප්‍රමාදවී පැමිණුනේය ඔහුද මාගේ මිතුරෙකි.. මේ වන විට ලංකාව දහනව වන පන්දු වාරය දමමින් සිටියේ..

තරගයේ තිබු ආකර්ෂණය නිසා හෝ අපට වැඩි වැඩියෙන් ඇතිවූ පිපාසය නිසා හෝ රැගෙන විත් තිබු බියර් ප්‍රමාණයේ පැහැදිලි අඩුවක් පෙනෙන්නට විය... එබැවින් සියලු දෙනාගේම අදහස වුයේ නැවත පිපාසයක් ඇති උවොතින්  බිමට යමක් නැතිවේය යන බිය නිසා නැවත බියර් ටිකක් ගෙනැවිත් තියා ගත යුතු බවයි..

බියර් ගෙන ඒමේ කාර්යය සදහා මමත් මෝටර් බයිසිකලේ ආ මිතුරාත් ස්වේච්චාවෙන් ඉදිරිපත් විය.. කිලෝමීටර් දෙකක් පමන දුර ඇති වයින් ස්ටෝර්ස් එක වෙත යෑමට අප තෝරා ගත්තේ මෝටර් බයිසිකලයයි ...

මිතුරා බයිසිකලය පැදවුහ මම පසුපස වාඩි උනේමී... එහෙත් අවන්හල් භූමියෙන් ප්‍රධාන පාරට දමා ඔහු බයිසිකලය නතර කලේය..

“චමී උබ පැදපන්....

ඒ වේලාවේ මා සිතුවේ බියර් බිම නිසා ඔහුට බයිසිකලය පැදවීමට අපහසුවක් ඇතයි යනුවෙනි.. එහෙත් එහෙම පෙනුමක්ද නැත.. කෙසේ වෙතත් දැන් මා සිතන්නේ ඒ මාගේ නරක වේලාවක් බවය ..

එතැන් සිට චමී රයිඩ් කරන්නට විය... වයින් ස්ටෝර්ස් එක  පෙනෙන මානයේදී පොලිස් සුනකයන්දෙදෙනෙක්  ..ඔහ් සමාවන්න   පොලිස් නිලධාරීන් දෙදෙනෙක් පාරට පැන බයිසිකලය නතර කිරීමට අන කලේය...  ඒවිට  වේගයෙන් යෑමට හෝ හැරවීමට කාලයක් නැත  . නැතිනම් ලොවෙත් චමිව අල්ලනවානම්  බොරුය..

එබැවින් මම වැදහත් ලෙස නතර කලෙමි ..

“කොහෙද යන්නේ  ලයිසන් එක ගන්න “ කොලු පහේ පොලිස් නිලදාරිය කිවේය..

“ටවුන් එකට ආව “ මම ලයිසොන් කරදහිය දිගු කලෙමි ...

“කොහෙද ගියේ “ ඒ විට  ඔහු මගේ  මුව ලගටම ඔහුගේ නාසය සහ මුව ලංකර ඇසුවේය..

“මැච් එක බලන ගමන් පොඩි උවමනාවකට ටවුමට ආව “ මම අඩියක් පිටු පසට ගොස් උත්තර දුන්නේය .

“ගම කොහෙද “

 ඒවර ඔහු අඩි දෙකක් ඉදියට ඇවිත් මගෙන් ඇසුවේය . දැන් ඔහුගේත් මගෙත් අතර පරතරය අගලකට අඩුය .. ඔහුගේ මුවත් මගේ මුවත් ගෑවෙන්නට ඔන්න මෙන්නය.. මා  විලි ලජ්ජාවෙන් ඇබරි ගියෙමි

අවට මිනිසුන්ද ඇත . මේ දෙනෝදාහක් ගැවසෙන ටවුමකි .. කෙල්ලන් හැර කොල්ලෙක් මේතරම් මා හට ලංවූ ප්‍රථම වතාවය .. ලැජ්ජාවේ බැරිය..

“මෙහෙම තමයි ගමත්... “ මම අහක බලාගෙන උත්තර දුන්නෙමී ..

“බිලා නේද ඉන්නේ “ බළලා මල්ලෙන් පැන්නේ ඒ විටය මු මේ තරම් මට සමීප උනේ සුවද බැලීමටය
 ( මත් පැන් වලට ගද කියනවාට මා කැමති නැත )

මට කියන්නට දෙයක් නැත.. ඔහු මාගේ ශරීරය ඉවකර නිගමනයකට පැමිණ ඇත.. පොලිස් පුහුණුවේදී සුනකයන්ට මෙන්ම නිලධාරීන්ටද ඉව කිරීමේ පුහුණුව ලබාදී ඇතුවාට සැක නැත..

“ඔව් බියර් එකක් බිව්වා අද මැච් එකනේ “

ඔහු මා බයිසිකලයේ පිටුපස හිදුවාගෙන පොලිසිය වෙත පැදවුයේය...

මිතුරා දුරකථනයෙන් කාටද කථා කරයි.. මා මේ කන්නේ ඔහු බෙදා ගත් පරිප්පුව බව ඔහුට ගානක් නැතුවා සේයා..

එහෙත් ඔහු ඔය ඇමතුම් දෙන්නේ අපගේ මිතුරන්ටය.. තව මොහොතකින් ඔහු සහ පිරිස මා සොයාගෙන පොලොසියට පැමිණෙනවා නිසැකය  ... ඒවිට වන්නේ අප සැමගේ මැච් බැලීමේ ආසාවට කෙලවිමය ..

මා රැගෙන ගිය නිලධාරියා මා පුටුවක වාඩි කරවා පොඩි පෙට්ටියක් ගෙන විවුර්ත කලේය.. එහි තිබුනේ පුංචි ඉන්ජෙක්සන් සිලින්ජර් වලට සමාන  දෙයකි... මා සිතුවේ ඔහු මට එන්නතක් දෙන්නට සැරසෙනවා කියාය.. එහෙත් මට ජල භීතිකාවට එන්නත් දී ඇත..

ඔහු එය පුංචි පොලිතින් උරයක් වැනි යමකට සවිකර මට එය පුම්බන්න කියා දුන්නේය.. මට තේරුනේ එවිටය එය මත් පානය කළාදැයි පරික්ෂා කරන බැලූමය..

මම එය පිම්බුවේය...

ඔහු එය පරික්ෂා කලේය .. ඉන් පසු “ හරියට පාට උනේ නැහැනේ .. මොනවද බිව්ව ජාතිය ස්ට්‍රෝන් ද ?”

මම ඔව් යයි කීවෙමි ..

ආයේ ටිකක් පුම්බන්න ..

නැවත පිම්බු විට ඔහුට සතුටු  දායක මට්ටමෙන් බැලුම තිබෙන්නට ඇත ..

එතැන් පටන් මා වැරදි කරුය .. මා වෙනුවෙන් සුදානම් කර තිබු පුංචි සුන්දර කුඩුවකට වී ග්‍රිල් අතරින් ඈතින් පෙනෙන පුංචි කළු සුදු තිත් සහිත රූපවාහිනියෙන් මම  ලංකා ක්‍රීඩකයන් පන්දුවට පහර දෙනවා නැරබුවෙමි .. එහෙත් ක්‍රීඩකයන් කව්දැයි හදුනා ගැනීමට අපහසුය ඒ තරම් අපැහැදිලිය  ඒ නැතත් ඒ තරම් දුරක් ග්‍රහණය කරගැනීමට තරම් මාගේ දෑස් පෙනීම ත්‍රිව් නැත..

වඩාත් හොදින් තරගය නැරබීමට උදේ ඉදන් පෙරූ පිරුම් හිරු දුටු පිනිසේ දියවී ගියේය... අවන්හලේ සිටියේ එක පැයකි පොලෝසියේ පැය හතරකි..

මාගේ මිතුරන්ද උන්ගේ බලපුලුවන් කාරයන්ද මා බේරා ගැනීමට ගත් උත්සාහයන් අසාර්ථකය .. අවසානයේ පැය හතරකට පසු ඇප ලබාදී මා නිදහස් කිරීමට ඔවුන්ට සිදුවිය ..

විස්සයි විස්සේ තරගය කොදෙව්වන් ජයගත් බව දැනගත්තේද පොලිස් කොස්තාපල් කෙනෙකුගෙන්ය.. මා නිදහස් වන විට ක්‍රීඩා කල ක්‍රීඩකයන් නිවෙස් වලට යන්නටද ඇත.. ඒ තරම් රැ බොවී තිබුණි.. පාන්දරද මන්දායා...

පෙරුම් පුරා බැලීමට සිටි විස්සයි විස්සේ තරගය නිමා වුයේ එලෙසය...

කොදෙව් කණ්ඩායමට මාගේ සුභපැතුම් !!!   ඒ වාගේම අප වගේ පුංචන්ට නීතිය අකුරටම ක්‍රියාත්මක කරන අප නගරයේ පොලොසියටද මාගේ හදපිරි ප්‍රණාමය පුදකර සිටිමි!!!